Протест на поштарите – за редовни плати и подобри услови за работа

Ахмед, вработен 20 години како теренски поштар во Македонската пошта, денеска беше дел од протестот организиран од Синдикатот на пошти во земјава. Тој вели дека освен што работат за мали плати, вработените се соочуваат и со доцнење на платите и тешки услови за работа.

„Работам како поштар на терен, а денеска се протестира за тоа што ги немаме условите за работа и особено исплатите, па имаме деца кои очекуваат родителите да донесат леб, надминати се сите рокови и наместо на 15-ти денес е 22-ри а моите деца се уште чекаат леб“, вели Ахмед Салихаси – Поштар.

Од синдикатот на пошти велат дека и покрај претходните протести, не е решено прашањето за добивање редовни плати и не е преземено ништо за промена на работењето и организацијата на Поштата.

Од поштенскиот синдикат најавија дека ќе штрајкуваат од 7 јуни.

Авни Тахири