Во првите 100 дена од мандатот, Министерството за надворешни работи не го реши целосно проблемот со недостаток на амбасадори на земјата во светот

Во првите 100 дена од овој мандат, владата не успеа целосно да го реши неколку годишниот проблем со дипломатското застапување. Земјата сè уште нема амбасадори во САД, Русија, Обединетите нации и други. Амбасадор нема ниту во Софија. Пред неколку дена, 8 амбасадори беа испратени во конзуларните и дипломатските претставништва, за уште 12 се очекува да бидат интервјуирани во Собранието. Министерот за надворешни работи Бујар Османи се правда со фактот дека ова е наследен проблем.

„Ние во министерството сме подготвени да испратиме десетици амбасадори уште во декември, но очекуваме оваа постапка да помине во Собранието. Има уште 6 амбасади за кои сè уште не сме назначиле никого “.

Советот на амбасадори имаше сериозни забелешки за изборот на кадри избрани за амбасадори, кои ги нарекуваше „под просек“ и блиски до политичките партии.

Долготрајниот проблем во домашната дипломатија не беше решен ниту во последниот мандат, иако беше ветено. За време на овој мандат, Министерството за надворешни работи презеде одговорност и за воспоставување на Преспанскиот форум, форум за решавање на билатерални прашања по примерот на Охридскиот договор, Договорот од Преспа и Договорот со Бугарија. Јавноста не виде ништо конкретно, но Османи вели дека тие се во фаза на подготовка.

„Формиравме работна група и назначив координатор кој веќе го подготви првиот нацрт на концептот, така да се подготвуваме. Верувам дека од крајот на јануари ќе ги испратиме првите покани до премиерите и министрите кои ќе бидат поканети на овој прв форум “.

И додека се формираат форуми по примерот на Преспа, овој Договор значително заостанува во некои области на имплементација, главно во областа на енергијата и ревизијата на учебниците. Грција дури предупреди на блокирање на почетокот на преговорите на Скопје со ЕУ доколку договорот не се спроведе.

Fatlume Dervishi