NASA publikon videon: Vorbulla e dioksidit të karbonit në qiell
Emetimet njerëzore të CO2 po ngrohin planetin dhe po shkaktojnë ndryshime klimatike.
Bota arriti temperaturën e saj më të nxehtë të regjistruar të dielën, më 21 korrik, sipas të dhënave paraprake nga Copernicus, programi i vëzhgimit të Tokës të Bashkimit Evropian.
Temperatura mesatare e sipërfaqes atë ditë ishte 17.09 gradë, që është pak më e lartë se rekordi i mëparshëm, i regjistruar në korrik të vitit të kaluar – 17.08 gradë.
“Ne po përpiqemi të shpjegojmë se nga vjen karboni dhe si ndikon ai në planet. Këtu mund të shihni se si modelet e ndryshme të motit lidhin gjithçka së bashku”, tha shkencëtari klimatik Leslie Ott i Qendrës së Fluturimeve Hapësinore Goddard të NASA-s.
Videoja e bën të qartë se me të vërtetë nuk ka rëndësi se nga vijnë saktësisht emetimet më të mëdha, ne të gjithë duhet të përballemi me pasojat në fund. Megjithatë, ka disa dallime interesante globale, shkruan Universe Today .
Mbi SHBA, Azinë Jugore dhe Kinën, pjesa më e madhe e karbonit vjen nga industria, termocentralet dhe transporti. Por në Afrikë dhe Amerikën e Jugut, shumica e CO2 vjen nga djegia (përfshirë zjarret në pyje), djegia e produkteve bujqësore dhe pastrimi i tokës. Emetimet vijnë edhe nga lëndët djegëse fosile si nafta dhe qymyri.
Emetimet pulsuese tregojnë zjarre që zakonisht ndizen gjatë ditës dhe më pas shuhen gjatë natës. Përveç kësaj, pemët dhe bimët kryejnë fotosintezën gjatë ditës, duke çliruar oksigjen dhe thithur CO2. Në Amerikën e Jugut dhe tropikët ka më shumë pulsim sepse të dhënat u mblodhën gjatë sezonit të rritjes.
Ky vizualizim bazohet në GEOS, një sistem modelimi i integruar për sistemet e kombinuara të atmosferës, oqeanit dhe tokës. Në këtë mënyrë, NASA përdor superkompjuterët për të treguar se çfarë po ndodh në atmosferë. GEOS bazohet në një grup të madh të dhënash; duke përfshirë të dhënat nga satelitët Terra dhe Suomi-NPP. Rezolucioni i GEOS është më shumë se 100 herë më i madh se modelet tipike të motit.
