Ndotja e ajrit është më e rrezikshme nga sa mendonim, thotë studimi i ri

Edhe ekspozimi më i shkurtër ndaj ajrit të ndotur ndikon në aftësinë e njerëzve për t’u përqendruar në detyrat e përditshme, tregon një studim i kryer në MB. Hulumtimi i botuar në revistën Nature Communications tregon se ekspozimi ndaj niveleve të larta të grimcave PM ndikon në vëmendjen selektive dhe njohjen e emocioneve te subjektet – pavarësisht nëse ata marrin frymë normalisht, përmes hundës ose përmes gojës. Kjo mund të shkaktojë një ulje të aftësisë për t’u përqendruar në detyra, t’i bëjë njerëzit të humbasin më lehtë vëmendjen dhe madje të bëjnë që ata të sillen në mënyrë të papranueshme, thonë shkencëtarët.

“Pjesëmarrësit e studimit që ishin të ekspozuar ndaj ajrit të ndotur nuk dolën mirë në një test të rezistencës ndaj shpërqendrimit.” Kjo do të thotë se ata mund të jenë të hutuar në jetën e tyre të përditshme. “Blerjet në supermarket janë një shembull i mirë… Kjo mund të nënkuptojë se jeni më të prirur ndaj blerjeve impulsive ndërsa ecni nëpër dyqan, sepse nuk mund të përqendroheni te qëllimet tuaja”, thotë Dr. Thomas Fayerty nga Universiteti i Birminghamit, një nga autorët e studimit.

Shkencëtarët analizuan të dhënat nga testet njohëse që 26 pjesëmarrës i kryen para dhe pasi u ekspozuan ndaj niveleve të larta të grimcave PM, duke përdorur tymin e qirinjve dhe ajër të pastër, me ekspozim që zgjat një orë.

Ndotja e ajrit është një nga faktorët më të mëdhenj të rrezikut për shëndetin publik në botë. Organizata Botërore e Shëndetësisë (OBSH) vlerëson se ndotja e ajrit të jashtëm shkakton rreth 4.2 milionë vdekje të parakohshme në mbarë botën çdo vit.

“Studimi tregoi gjithashtu se pjesëmarrësit performuan më keq në njohjen e emocioneve pas ekspozimit ndaj grimcave PM”. “Ata janë më keq në “leximin” e fytyrave, nëse janë të frikësuar apo të lumtur dhe kjo mund të ketë pasoja për mënyrën se si ne sillemi me njerëzit e tjerë”, thotë profesor Fayerti.

Kështu, disa kërkime e lidhin ndotjen e ajrit me krimin e dhunshëm, veçanërisht në qytetet amerikane. Nga ana tjetër, kujtesa e punës e subjekteve nuk u ndikua, gjë që tregon se disa funksione të trurit janë më rezistente ndaj ekspozimit afatshkurtër ndaj ndotjes.

Studiuesit thonë se gjetjet mund të kenë implikime në fusha të rëndësishme socio-ekonomike, si arsimi dhe produktiviteti në punë.

“Studimi u krye në një popullatë të rritur klinikisht të shëndetshëm, që do të thotë se subjektet ishin në gjendje të mirë shëndetësore dhe nuk kishin probleme klinike të frymëmarrjes apo neurologjike… Disa grupe të tjera mund të jenë më të ndjeshme ndaj këtyre ndikimeve,” shtoi Fayerti.

Studimi është pjesë e formësimit të politikave dhe masave të ardhshme të shëndetit publik.

Projekti më i madh po studion burimet e ndryshme të ndotjes që po bëhen më të zakonshme… Të tilla si emetimet nga pajisjet e gatimit, djegia e drurit, shkarkimet e makinave dhe produktet e pastrimit, për të parë nëse mund ta drejtojmë politikën në një drejtim të caktuar. “Nëse e dimë se produktet e pastrimit shkaktojnë shumicën e problemeve që unë përshkruaj, atëherë ne mund të ndikojmë në politika,” shpjegoi Faherty.

Qëllimi, thotë ai, është të rregullohen gjërat që janë thelbësisht të gabuara, në vend që thjesht të matet ajo që është në ajër pasi është ndotur.