Ndryshimet në Kodin Penal, Lëvizja Besa me kritika të ashpra ndaj pushtetit

Lëvizja Besa akuzon partitë në pushtet LSDM dhe BDI për degradimin e pushtetit gjyqësor me ndërhyrjet e vazhdueshme përfshirë ndryshimet e fundit në Kodin Penal. Sipas kësaj partie, ndryshimet e miratuara janë kundërshtim me vlerat demokratike dhe interesin strategjik të vendit. Këto shkelje sipas Besës vërtetohen edhe nga deklarata e Departamentit Amerikan të Shtetit i cili reagoi ashpër për ndryshimet e bëra.

“Me këto ndryshime të Kodit Penal rrezikohet që një numër i madh i lëndëve gjyqësore të cilat janë proceduar nga Prokuroria Speciale të parashkruhen apo të vjetërsohen edhe atë: Titanik, Target/Fortesa, TNT, Titanik 2, Thesari, Talir dhe Trajektorja, ndërkaq të akuzuarit në këto lëndë gjyqësore t’i ikin përgjegjësisë penale për veprat e tyre në dëm të buxhetit të shtetit dhe qytetarit. Të njëjtën porosi e përçuan edhe shumë organizata jo-qeveritare ndërkombëtare dhe nacionale nga sfera e drejtësisë të cilat mes tjerash potencojnë se këto ndryshime janë në kundërshtim me përkushtimin për luftë të pakushtëzuar kundër korrupsionit dhe për forcimin e sanksioneve ndaj personave të dënuar për vepra korruptive”, deklaroi Fatmir Sabriu, Lëvizja Besa. /Alsat.mk