Netanyahu për sulmet në Gaza: Ky është vetëm fillimi

ISRAEL ka “rifilluar luftimet me fuqi të plotë” kundër Hamasit në Rripin e Gazës, tha mbrëmë kryeministri Benjamin Netanyahu. Ai paralajmëroi se “negociatat do të vazhdojnë vetëm nën zjarr” dhe se “ky është vetëm fillimi”, raporton BBC .

Deklaratat e tij erdhën pasi avionët izraelitë kryen sulme masive ajrore ndaj objektivave që ushtria tha se ishin të lidhura me Hamasin në Gaza.

Më shumë se 400 njerëz u vranë në sulmet, njoftoi ministria e shëndetësisë e kontrolluar nga Hamasi dhe qindra u plagosën.

Vala e sulmeve ishte më e rënda që nga fillimi i armëpushimit më 19 janar. Një armëpushim i brishtë është mbajtur kryesisht deri më tani, por kjo valë e re sulmesh sugjeron se planet për një fund të përhershëm të luftës mund të mos jenë më në tryezë.

Sulmet ajrore që goditën Beit Lahija, Rafah, Nuseirat dhe Al-Mawasi dje prishën një paqe dymujore dhe spitalet u mbytën sërish me viktima.

Dënimi i sulmeve

Sulmet në Gaza u dënuan nga Egjipti, ndërmjetësi në negociata. Sulmet ajrore janë një “shkelje e rëndë” e marrëveshjes së armëpushimit dhe përfaqësojnë një “përshkallëzim të rrezikshëm”, tha Tamim Khallaf, një zëdhënës i Ministrisë së Jashtme egjiptiane.

“Unë isha i tronditur që lufta filloi përsëri, por në të njëjtën kohë, kjo është ajo që ne prisnim nga izraelitët,” tha Hael, një banore e Jabalia al-Balad për BBC Arabic. “Si qytetar jam i rraskapitur. Mjaft është – një vit e gjysmë deri këtu! Mjaft më”, shtoi ai.

Netanyahu tha në fjalimin e tij se Izraeli ishte përpjekur të negocionte me Hamasin për lirimin e pengjeve izraelitë që ende mbahen në Gaza. Ai akuzoi Hamasin se e refuzoi propozimin çdo herë.

Izraeli dhe Hamasi nuk kanë rënë dakord nëse do të zgjasin armëpushimin pasi pjesa e parë skadoi në fillim të marsit, pas shkëmbimeve të shumta të pengjeve izraelitë dhe të burgosurve palestinezë. Marrëveshja përfshin tre faza dhe negociatat për fazën e dytë duhej të fillonin gjashtë javë më parë – por kjo nuk ndodhi.

Akuza të ndërsjella për prishje të marrëveshjes

Në vend të kësaj, marrëveshja u rrëzua kur SHBA dhe Izraeli donin të ndryshonin kushtet e marrëveshjes, për të zgjatur fazën e parë në të cilën do të liroheshin më shumë pengje. Kjo do të vononte fillimin e fazës së dytë, e cila do të vendoste një armëpushim të përhershëm dhe do të kërkonte tërheqjen e trupave izraelite nga Gaza. Por Hamasi e hodhi poshtë këtë propozim për të ndryshuar marrëveshjen e ndërmjetësuar nga SHBA, Katari dhe Egjipti, duke e quajtur atë të papranueshëm.

Netanyahu tha se Izraeli do të vazhdojë të luftojë për të arritur të gjitha qëllimet e tij të luftës – “për të liruar pengjet, për të hequr qafe Hamasin dhe për të siguruar që Hamasi të mos jetë më një kërcënim për Izraelin”.

Administrata e Presidentit të SHBA Donald Trump u konsultua me Izraelin përpara se të kryente sulmet, thanë zyrtarët. Zëdhënësi i Këshillit të Sigurisë Kombëtare të SHBA-së, Brian Hughes tha: “Hamasi mund të kishte liruar pengjet për të zgjatur armëpushimin, por në vend të kësaj zgjodhi refuzimin dhe luftën”.

Hamasi paralajmëroi se dhuna e vazhdueshme nga Izraeli do të “impononte një dënim me vdekje” për pengjet e mbetura të gjallë që mban në Gaza dhe akuzoi Izraelin se po përpiqej të detyronte një dorëzim.

Të tmerruar familjet e pengjeve izraelitë

Mohammed Zaquot, drejtor i përgjithshëm i spitaleve në Rripin e Gazës, i tha BBC-së se “sulmet ishin aq të papritura sa numri i personelit mjekësor nuk ishte i mjaftueshëm për shkallën e këtyre sulmeve të mëdha, kështu që ekipet shtesë u thirrën menjëherë”.

Një grup që përfaqësonte familjet e pengjeve akuzoi qeverinë izraelite se kishte vendosur të “heqë dorë nga pengjet” duke nisur sulme të reja – dhe ata protestuan jashtë parlamentit izraelit. Lajmet për sulmet kanë tmerruar disa familje të pengjeve izraelitë që ende mbahen nga Hamasi.

Izraeli thotë se Hamasi ende mban peng 59, 24 prej të cilëve besohet se janë gjallë. Lufta filloi kur Hamasi sulmoi Izraelin më 7 tetor 2023, duke vrarë rreth 1200 njerëz dhe duke marrë 251 pengje në Gaza. Izraeli u përgjigj me një ofensivë masive ushtarake që vrau më shumë se 48,500 palestinezë, sipas shifrave palestineze, dhe shkatërroi pjesën më të madhe të Gazës.