Nisma e 7 vendeve të BE-së, për integrim më të shpejtë të Ballkanit Perëndimor

Gazetar: Luka Andreev

Austria dhe gjashtë vende të tjera anëtare të BE-së,  kërkojnë që pranimi i vendeve të Ballkanit Perëndimor në BE, të përshpejtohet me energji të rinovueshme. Ministri i Jashtëm austriak, Aleksandar Shalenberg, ka nisur formimin e një “Grupi miqsh të Ballkanit Perëndimor”. Ai përfshin gjithashtu Kroacinë, Republikën Çeke, Greqinë, Italinë, Sllovakinë dhe Slloveninë. Ata u takuan sot në Austri dhe miratuan “Deklaratën e Getvajgut”, 20 vjet pas Kongresit të Selanikut, i cili, dy dekada më parë, i dha shpresë integrimit evropian të vendeve në rajon.

Aleksandar Shallenberg, Ministër i Punëve të Jashtme të Austrisë

“Ne kemi humbur 20 vjet. Kemi humbur momentin. Zgjerimi është një test lakmusi për Europën. Fokusi tani është në Ukrainë, e cila po lufton për mbijetesë, por BE gjithashtu duhet të shikojë fqinjët e saj jugorë në Ballkanin Perëndimor. Ukraina dhe Moldavia gjithashtu kanë pasur statusin zyrtar të kandidatit të BE-së, që nga viti i kaluar. Kjo ka ngritur disa shqetësime, veçanërisht në Austri, duke pasur parasysh mundësinë që Ballkani Perëndimor mund të lihet vetëm. ”

Deklarata e përtërirë mbi integrimin evropian të rajonit u mirëprit gjithashtu nga Ministri i Jashtëm çek, Jan Lipavski. Sipas tij, nevojitet më shumë kurajo nga ana e vendeve anëtare të BE.

“Kjo është shumë e rëndësishme për Ballkanin Perëndimor. Nevojitet më shumë guxim nga BE-në, dhe vendet e Ballkanit Perëndimor për të zgjidhur çështjet e hapura. Tani është koha e duhur për ta bërë këtë. Në rastin e Ukrainës, situata është e ndryshme,” tha Jan Lipavski – Ministër i Punëve të Jashtme të Republikës Çeke.

Një deklaratë e përbashkët nga shtatë vendet anëtare të BE-së, të cilat kanë vendosur të mbështesin zgjerimin më të shpejtë me vendet e Ballkanit Perëndimor, thotë se procesi i zgjerimit është shumë i ngadaltë dhe nganjëherë shumë kompleks dhe burokratik. Ata janë të mendimit të përbashkët se ka shumë pak rezultate të dukshme dhe të prekshme për qytetarët e Ballkanit Perëndimor, veçanërisht për të rinjtë, dhe kjo çon në “zhgënjim dhe tjetërsim” nga BE. Megjithatë, ata theksuan mbylljen e çështjeve të hapura dhe përqëndrimin në reformat e brendshme. /alsat.mk