Niveli i ulët i ujit të Danubit zbuloi anije nga Lufta e Dytë Botërore

Anijet që dolën në sipërfaqe ishin mes qindrave të fundosura nga Flota e Detit të Zi të Gjermanisë naziste në vitin 1944 teksa u tërhoq nga një sulm i forcave sovjetike. Këto mbeturina ende pengojnë trafikun e lumenjve gjatë periudhave të niveleve të ulëta të ujit, raporton Reuters.

Megjithatë, thatësira e këtij viti, të cilën shkencëtarët e shohin si pasojë e ngrohjes globale, ka zbuluar më shumë se 20 mbytje anijesh në një pjesë të Danubit pranë fshatit Prahovo në Serbinë lindore, shumë prej të cilave ende mbajnë tonelata municione dhe eksplozivë dhe përbëjnë rrezik për anijet.

“Flotilla gjermane la pas një katastrofë të madhe mjedisore që kërcënon banorët e Prahovës”, tha Velimir Trajilović, një pensionist nga Prahovo, i cili shkroi një libër për anijet gjermane, siç raporton N1.

Punëtorët në industrinë vendase të peshkimit, si dhe ata nga Rumania përtej lumit, janë gjithashtu në rrezik.

Muaj të thatësirës dhe temperaturave rekord kanë ndërprerë trafikun lumor në arteriet vitale në pjesë të tjera të Evropës, duke përfshirë Gjermaninë, Italinë dhe Francën. Në Serbi, autoritetet iu drejtuan gërmimit për të mbajtur të hapura rrugët ujore të Danubit.

Në Prahovo, në disa vende pjesa e lundrueshme është ngushtuar në vetëm 100 metra nga 180 e mundshme.

Të shpërndara nëpër shtratin e lumit, disa nga anijet kanë ende ura lidhëse me kube, direkë të thyer dhe byk të përdredhur, ndërsa të tjerat shtrihen kryesisht të zhytura nën brigjet e rërës.

Në mars, qeveria serbe shpalli një tender për shpëtimin e anijeve të mbytura dhe heqjen e municioneve dhe eksplozivëve. Kostoja e operacionit llogaritet në 29 milionë euro.