OKB: Izraeli dhe palestinezët mund të kenë shkelur ligjet në sulmet e fundit
Komisionerja e Lartë e Kombeve të Bashkuara për të drejtat e njeriut tha se ushtria e Izraelit mund të ketë kryer krime lufte në Gaza dhe se militantët palestinezë të Hamasit, gjithashtu kanë shkelur të drejtën ndërkombëtare humanitare, teksa kanë hedhur raketa në drejtim të Izraelit.
Michelle Bachelet i bëri këto komente më 27 maj, teksa iu adresua një sesioni të posaçëm të Këshillit për të drejtat e njeriut të OKB-së, mbledhje që u thirr me kërkesë të shteteve myslimane, të cilat dëshirojnë që të nisë një hetim lidhur me konfliktin e fundit në Gaza, por edhe për situatën e të drejtave të njeriut në Bregun Perëndimor dhe Jerusalemin Lindor.
Para se të arrihej marrëveshja e armëpushimit javën e kaluar, Bachelet tha se zyra e saj ka verifikuar vdekjen e 270 palestinezëve në Gaza, Bregun Perëndimor dhe Jerusalemin Lindor, përfshirë edhe 68 fëmijë, të cilët vdiqën nga dhuna gjatë këtij muaji. Nga raketat e lëshuara nga Hamasi janë vrarë dhjetë izraelitë.
Gjatë luftës 11-ditore, sulmet ajrore izraelite në zonat e banuara në Rripin e Gazës “rezultuan me numër të lartë të vdekjeve dhe plagosjes së civilëve, dhe me shkatërrime të infrastrukturës civile”, tha Bachelet.
