Paralajmërim për sulme terroriste në Turqi

Ambasada e Shteteve të Bashkuara në Turqi paralajmëroi amerikanët për sulme të mundshme kundër kishave, sinagogave dhe misioneve diplomatike në Stamboll, në njoftimin e saj të dytë të këtij lloji në katër ditë. Në një paralajmërim të përditësuar të sigurisë, Ambasada amerikane tha se “sulme të mundshme hakmarrëse nga terroristët” mund të ndodhin në zonat e frekuentuara nga perëndimorët, veçanërisht në lagjet Beyoglu, Galata, Taksim dhe Istiklal. Autoritetet turke po hetojnë çështjen, thuhet më tej në deklaratë. Të premten, disa ambasada në Ankara, duke përfshirë ato të Shteteve të Bashkuara, Gjermanisë, Francës dhe Italisë, lëshuan paralajmërime për sulme të mundshme hakmarrëse kundër objekteve fetare, pas incidenteve të djegies së kuranit në Evropë.