Pekini: Nuk do të kundërpërgjigjemi ndaj tarifave të tjera të SHBA-së

Kina ka njoftuar një rritje të mëtejshme të tarifave për produktet amerikane, duke i rritur ato nga 84 për qind në 125 për qind.

Vendimi vjen si pjesë e një politike ekonomike që Kina ka ndërmarrë për të reaguar ndaj masave të ngjashme që janë marrë nga SHBA ndaj produkteve kineze.

Megjithatë, autoritetet kineze kanë theksuar se nuk janë parashikuar rritje të mëtejshme të këtyre tarifave në të ardhmen, duke sugjeruar se ky është një masë përfundimtare në këtë fazë të konfliktit tregtar, shkruan skynews.

Ministria e Financave e Kinës shpjegoi se niveli aktual i tarifave ka një efekt të drejtpërdrejtë në tregun e brendshëm, duke theksuar se nuk ka pranueshmëri të tregut për produktet amerikane që eksportohen në Kinë.

Ky mesazh nënkupton se vendimi është marrë për të mbrojtur industrinë dhe ekonominë kineze nga konkurrenca e jashtme që vjen nga importet amerikane, të cilat kanë pësuar një ngritje të konsiderueshme në çmimet e tyre për shkak të tarifave të larta.

Në të njëjtën kohë, ministria theksoi se Kina do të reagojë në mënyrë të vendosur ndaj çdo veprimi të mëtejshëm të amerikanëve, duke thënë se “nëse SHBA vazhdon të vendosë tarifa për produktet kineze që eksportohen në Shtetet e Bashkuara, Kina do ta injorojë atë”.

Deklarata reflekton qëndrimin e Kinës ndaj presionit të vazhdueshëm nga administrata amerikane dhe sinjalizon se Kina është e gatshme të vazhdojë të mbrojë interesat e saj ekonomike dhe tregtare pa e lëshuar terrenin në këtë aspekt.

Ndryshe, SHBA-ja ka ngritur tarifat doganore në 145 për qind për mallrat kineze.