Pse e keni më të vështirë të ngriheni nga shtrati kur bie shi?
Tingulli i shiut të butë mund të jetë relaksues, por gjithashtu mund të na bëjë të ndihemi letargjikë.
Grija e vjeshtës dhe shiu e bëjnë largimin nga ngrohtësia e shtratit një sfidë të vërtetë.
Por pse ditët me shi ndikojnë kaq shumë në energjinë dhe disponimin tonë?
Psikologia Dr Rachel Molitor nga Universiteti i Coventry-t shpjegon pse është e vështirë të ngrihesh kur bie shi dhe si t’i lehtësosh mëngjeset me shi.
Sipas Dr.Molitor, ditët me shi i bëjnë shumë njerëz të ndjehen letargjik.
“Për disa, shiu përforcon dëshirën për të qëndruar në ambiente të mbyllura dhe për të ngadalësuar ditën, ndërsa për të tjerët mund të zgjojë një ndjenjë aventure”, shpjegon Dr.Molitor.
Reagimet tona ndaj shiut varen nga përvojat e kaluara dhe nga mënyra se si ne e perceptojmë shiun.
“Nëse planifikojmë ta kalojmë ditën brenda, shiu mund të mos ketë aq ndikim. Por nëse kemi planifikuar aktivitete në natyrë ose një udhëtim të gjatë, shiu mund të shkaktojë zhgënjim”.
Shiu shpesh vjen me qiell gri dhe më pak dritë dielli, gjë që ndikon në orën tonë të brendshme.
“Ritmet tona cirkadiane varen nga rrezet e diellit – kur ka më pak dritë, truri sinjalizon se është natë, gjë që mund të ulë vigjilencën tonë”, shpjegon Molitor.
Ndriçimi i dobët mund të ngadalësojë trupin tonë, të reduktojë motivimin dhe të vështirësojë daljen nga shtrati.
Gjithashtu, i ftohti shton ndjenjën e rehatisë nën një batanije të ngrohtë, gjë që e bën të vështirë daljen nga shtrati.
“Rënia e temperaturës mund të rrisë dëshirën për të ruajtur energjinë, duke e bërë më të vështirë ngritjen në mëngjes dhe fillimin e ditës”, shton Molitor.
Zhurmat e shiut kanë një efekt qetësues dhe mund të na bëjnë të përgjumur. “Tingujt e butë të shiut janë qetësues dhe nxisin relaksimin”, thotë Dr. Molitor.
“Gjatë ditëve me shi zvogëlohet prodhimi i kortizolit, hormoni që na mban zgjuar, ndërsa melatonina, hormoni që nxit gjumin, rritet”.
Kombinimi i këtyre faktorëve shpesh çon në ndjenjën e lodhjes dhe letargjisë, duke i bërë mëngjeset me shi një sfidë të veçantë.
Si ta bëni më të lehtë zgjimin në ditët me shi? Mundohuni të kaloni sa më shumë kohë të jetë e mundur nën dritën natyrale dhe siguroni një rutinë të ngrohtë për një fillim më të lehtë të ditës.
