Qyteti zviceran lejon mjekët të përshkruajnë vizita falas në muze si terapi

A ju shqetësojnë problemet botërore? Ndiheni të rraskapitur në punë? Keni nevojë për diçka më shumë për të luftuar një sëmundje apo për t’u përgatitur për kirurgji? Qyteti zviceran i Neuchatel po u ofron banorëve të tij një opsion të ri mjekësor – ekspozoni veten ndaj artit dhe merrni një shënim mjeku për ta bërë këtë falas.

Sipas një projekti të ri pilot dy-vjeçar, autoritetet lokale dhe rajonale po mbulojnë koston e “recetave muzeale” të lëshuara nga mjekët të cilët besojnë se pacientët e tyre mund të përfitojnë nga vizitat në cilindo nga katër muzetë e qytetit si pjesë e trajtimit të tyre.

Projekti bazohet në një raport të Organizatës Botërore të Shëndetit të vitit 2019, i cili zbuloi se arti mund të nxisë shëndetin mendor, të zvogëlojë ndikimin e traumës dhe të zvogëlojë rrezikun e rënies njohëse, dobësisë dhe “vdekshmërisë së parakohshme”.

Arti mund të ndihmojë në relaksimin e mendjes, si një lloj ilaçi parandalues, dhe vizitat në muze kërkojnë ngritjen dhe daljen nga shtëpia me aktivitet fizik si ecja dhe qëndrimi në këmbë për periudha të gjata kohore.

“Me mbylljen e vendeve kulturore (gjatë karantinave), njerëzit e kuptuan se sa shumë ne kemi nevojë për ta për t’u ndjerë më mirë,” thotë Delafontaine.

Ajo shtoi se deri më tani rreth 500 receta u janë shpërndarë mjekëve në të gjithë qytetin dhe se programi kushton “shumë pak”. Për të janë buxhetuar dhjetë mijë franga zvicerane (rreth 11,300 dollarë).

Nëse do të ketë sukses, autoritetet lokale mund ta zgjerojnë programin në aktivitete të tjera artistike si teatri ose kërcimi, vuri në dukje Delafontaine. Sistemi shëndetësor kombëtar zviceran nuk mbulon “kulturën si mjet terapie”, por ajo shpreson se një ditë mund të zbatohet, nëse rezultatet janë mjaft pozitive.

Dr. Marc-Olivier Sauvin, kreu i kirurgjisë në rrjetin spitalor Neuchâtel, tha se ai kishte përshkruar tashmë vizita në muze për dy pacientë për t’i ndihmuar ata të ishin në formë më të mirë përpara një operacioni të planifikuar. Për praktikën e tij, fokusi do të jetë tek pacientët që pranojnë se e kanë humbur zakonin për të dalë jashtë. Ai dëshiron që ata të rrisin lëvizjen.

– Mendoj se këta pacientë do të përfitojnë nga recetat e muzeut. Ne do t’u japim atyre një shans për të ushtruar fizikisht dhe intelektualisht. Dhe si mjek, është vërtet bukur të përshkruaj vizita në muze në vend të medikamenteve, apo analizave që pacientët nuk i pëlqejnë. Le t’u themi atyre: “Është urdhër mjeku që ju drejton të shkoni të vizitoni një nga muzetë e bukur të qytetit tonë,” përfundoi ai.