Reali e konfirmon: Naço mbetet në Madrid
Mbrojtësi Naço Fernandez ka arritur marrëveshje me Real Madridin për rinovimin e kontratës, duke zgjatur qëndrimin në klub edhe për një vit. Naço pritej të largohej nga “Santiago Bernabeu” këtë verë, pasi kontrata ti skadonte në fund të këtij muaji. Megjithatë, ai dhe drejtuesit e Real Madridit kanë arritur marrëveshje për rinovimin e kontratës deri në verën e vitit 2024.
Është vet klubi spanjoll që ka konfirmuar marrëveshjen me anë të faqes zyrtare në rrjetet sociale.
“Real Madrid CF dhe Nacho Fernandez kanë rënë dakord për të vazhduar kontratën e kapitenit tonë, i cili mbetet i lidhur me klubin deri më 30 qershor 2024”, thuhet në njoftim.
Ndryshe, Naço ka mbrojtur stemën dhe fanellën e Real Madridit për 22 vjet, që kur u bashkua me klubin në korrik 2001 me vetëm 11 vjet. Në Real Madrid ai ka luajtur 319 ndeshje dhe ka fituar 23 trofe: 5 Liga të Kampionëve, 5 Kupa të Botës për Klube, 4 Superkupa Evropiane, 3 La Liga, 2 Kupa të Mbretit dhe 4 Superkupa të Spanjës.
