Rezistenca ndaj antibiotikëve mund të vrasë më shumë se 39 milionë njerëz deri në vitin 2050, paralajmëron një studim i ri

Rezistenca ndaj antibiotikëve mund të shkaktojë vdekjen e më shumë se 39 milionë njerëzve deri në vitin 2050. Ky është përfundimi i studimit të publikuar në botimin shkencor “Lancet”, njoftuan agjencitë botërore.

Për herë të parë, një studim i tillë vlerëson ndikimin e rezistencës ndaj antibiotikëve ndër vite dhe përpiqet të parashikojë zhvillimin e tij.

Nga viti 1990 deri në vitin 2021, më shumë se një milion njerëz në vit vdesin në mbarë botën për shkak të rezistencës ndaj antibiotikëve. Autorët e studimit u fokusuan në 22 agjentë patogjenë, 84 kombinime patogjene-trajtimi dhe 11 sindroma infektive në njerëz të të gjitha moshave në 204 vende dhe territore përmes të dhënave për më shumë se 520 milionë njerëz.

Në këto tre dekada, vdekjet e fëmijëve nën moshën pesë vjeç të shkaktuara drejtpërdrejt nga rezistenca ndaj antibiotikëve kanë rënë me më shumë se 50 për qind, pasi parandalimi dhe kontrolli midis foshnjave dhe fëmijëve të vegjël janë përmirësuar.

Megjithatë, më rrallë tek këta fëmijë, infeksionet u bënë më të vështira për t’u trajtuar kur ato ndodhnin. Në të njëjtën kohë, shkalla e vdekjeve në mesin e të moshuarve të moshës 70 vjeç e lart u hodh me 80 për qind gjatë së njëjtës periudhë për shkak të plakjes së shpejtë të popullsisë dhe vulnerabilitetit më të madh të të moshuarve ndaj infeksionit.

Sa i përket agjentëve patogjenë, vdekshmëria për shkak të Staphylococcus aureus rezistent ndaj meticilinës është rritur më së shumti në mbarë botën.

Në dekadat e ardhshme, vdekjet për shkak të rezistencës ndaj antibiotikëve do të rriten edhe më shumë.

Sipas modeleve të studiuesve, numri i viktimave direkte mund të arrijë në 1.91 milion në vit në mbarë botën deri në vitin 2050, një rritje prej më shumë se 67 për qind krahasuar me vitin 2021. Nga mesi i këtij shekulli, rezistenca ndaj antibiotikëve do të luajë një rol më të madh në 8.22 milionë vdekje në vit, një rritje prej 74.5 për qind krahasuar me vitin 2021. Në total midis 2025 dhe 2050

Rezistenca ndaj antibiotikëve mund të jetë shkaku i drejtpërdrejtë i më shumë se 39 milionë vdekjeve në mbarë botën dhe do të lidhet me 169 milionë vdekje, sipas shkencëtarëve.

Megjithatë, skenarë më pak pesimistë janë gjithashtu të mundshëm, theksojnë autorët e studimit.

Ata gjithashtu kujtojnë se përmirësimi i trajtimit të infeksioneve dhe aksesi ndaj antibiotikëve mund të parandalojë 92 milionë vdekje në mbarë botën midis 2025 dhe 2050, veçanërisht në Azinë Jugore dhe Afrikën Sub-Sahariane.