Seancë publike në Gjykatën e Apelit për rastin “Llaskarca”

Gazetar: Suad Bajrami

Në Gjykatën e Apelit në Shkup mbahet seancë publike për rastin e aksidentit të autobusit të “Durmo Turs” në Llaskarcë më 13 shkurt të vitit 2019 në të cilin humbën jetën 16 persona dhe 38 të tjerë u lënduan, shkruan Alsat.

Kryetarja e Trupit Gjykues, Tatjana Dukovska, tre orë lexoi pjesë nga aktgjykimi prej 600 faqesh të cilin e shpalli Gjykata Penale e Shkupit më 24 janar të vitit 2024 me të cilin u dënuan 6 persona me gjithsej 39 vite burg. Dukovska, përshkroi dinamikën e ngjarjes, lexoi dëshmitë e dëshmitarëve, por edhe të ekspertëve, ndërsa kur përmendi me emër dhe mbiemër viktimat, familjarëve të tyre që ishin prezent në seancë, iu mbushën sytë me lot.

Prokuroria ka dorëzuar ankesa për 4 të akuzuar, pasi nuk është e kënaqur me lartësinë e dënimit, ndërsa ankesa nuk ka dorëzuar për shoferin e autobusit Manoil Trifunovski, i cili ka marrë dënimin më të lartë në shkallën e parë me gjithsej 14 vjet burg dhe të punësuarin e kontrollit teknik që ka kaluar autobusi, Jane Babarovski i cili është dënuar me 5 vite burg.

Të gjithë të akuzuarit, ashtu siç janë deklaruar edhe në shkallë të parë, nuk ndihem fajtorë dhe nuk pajtohen me aktgjykimin e penales dhe kërkojnë që apeli ta shfuqizojë dhe gjykimi të kthehet nga e para nën arsyetimin për shkelje thelbësore të procedurës, por edhe të konstatimit të gabuar të fakteve.

Për këtë, ankesat para trupit gjykues do t’i paraqesin edhe të dënuarit e tjerë gjegjësisht, përgjegjësi për transport në Durmo, Remzi Miftari i cili u dënua me 6 vjet burg, udhëheqësi i stacionit teknik, Igor Gjorgjievski dhe kolegu i tij Goran Dukovski të cilët u dënuan me nga 5 vjet burg, por edhe pronari i kompanisë Durmo, Durmish Beluli, i cili ka marrë dënimin më të ulët nga të gjithë, gjegjësisht 4 vjet.

Sipas aktgjykimit të shkallës së parë, autobusi ka qenë teknikisht i parregullt në aspektin e frenave, ndërsa ka pasur të vendosur manipulues për takografin që të manipulohet shpejtësia e lëvizjes së autobusit. Në aktgjykim, thuhet se shoferi e ka shkaktuar aksidentin si pasojë e pakujdesisë, i cili ka lëvizur me shpejtësi më të madhe se e lejuara.

Megjithatë, aktgjykimi ende nuk është i plotfuqishëm edhe pse nga aksidenti kanë kaluar më shumë se gjashtë vite. Për shkak të vëllimit të lëndës, seanca në Apel është parashikuar të vazhdohet edhe nesër.