Sharll Leklerk: Në Las Vegas mund të fitojmë dy vendet e para
Fundjava e kaluar nuk ka qenë shumë pozitive për Ferrarin, që humbi 7 pikë ndaj MekLarenit në renditjen e përgjithshme për konstruktorë në Formula 1. Tashmë “kokëkuqja” është 36 pikë pas britanikëve, ndërkohë që janë edhe tri gara deri në fund të botërorit.
Gara e radhës është në Las Vegas, pistë ku vjet Ferrari vuri në vështirësi Red Bullin, që ishte i pamposhtur në atë kohë, duke arritur “pole position” dhe vendin e dytë në garën me Sharll Leklerkun. Ndaj, këtë vit, piloti monegask kërkon të ngjitet në majën e podiumit.
“Vitin e kaluar ishim shumë të fortë në Las Vegas dhe shpresojmë të jemi në gjendje të përsërisim veten. Është e vërtetë që këtë sezon kemi bërë një hap të madh përpara në menaxhimin e gomave, që do të thotë se kemi humbur diçka kur temperaturat janë të ulëta”, tha Leklerk.
“Jam më shumë optimist për garën në Las Vegas. Shpresojmë të jemi në gjendje të punojmë në këto dy javë, për t’u përgatitur sa më mirë dhe për të qenë në një nivel të kënaqshëm. Karakteristikat e pistës janë më të mira për makinën tonë”, u shpreh piloti I Ferrarit.
“Mund të bëjmë shumë mirë në Las Vegas. Do të jetë e rëndësishme të marrim një rezultat, pse jo një fitore të dyfishtë, për të na afruar me MekLaren dhe për të fituar titullin e konstruktorëve. Edhe në Abu Dhabi mendoj se mund të bëjmë mirë. Kanë mbetur edhe tre gara dhe shpresojmë që të mund t’i shfrytëzojmë sa më shumë”, tha në fund Leklerk.
