Në javët e fundit, drejtuesit në disa kompani teknologjike kanë paralajmëruar vazhdimisht për rreziqet e inteligjencës artificiale – mbi të gjitha, ndikimin e saj të mundshëm negativ në tregun e punës. Pushimet nga puna për shkak të “IA” nuk janë një mit – ato tashmë po ndodhin në kompani anembanë botës, dhe mund të supozohet se zbatimi i kësaj teknologjie, paralelisht me pushimet nga puna ose ngrirjen e punësimeve, do të vazhdojë në të ardhmen.

Kjo u paralajmërua së fundmi nga Daniel Amodei, një ish-punonjës i “OpenAI” dhe drejtor aktual i “Anthropic AI”, i cili u bëri thirrje politikanëve dhe drejtuesve të mos e zbukurojnë situatën aktuale, sepse tregu i punës, siç tha ai, po përballet me “gjakderdhje”. Më të prekurat do të jenë të ashtuquajturat pozicione “jakë të bardhë” – punë administrative, zyre dhe intelektuale – ku “IA”, veçanërisht për pozicionet e nivelit fillestar, mund të eliminojë deri në gjysmën e vendeve të punës.

Fatkeqësisht, nuk e kuptoj se si mund ta shmangim këtë.

Nuk janë vetëm vendet e punës në nivel fillestar që janë në rrezik, por pothuajse të gjitha pozicionet. Siç paralajmëroi CEO i Klarna në një podcast javën e kaluar, kjo mund të çojë në një recesion. Sipas tij, zvogëlimi i numrit të punonjësve – nga pozicionet administrative te kontabilistët e deri te specialistët e IT-së – zakonisht shkakton një recesion, i cili, beson ai, po na pret edhe ne tani.

“Fatkeqësisht, nuk e shoh se si mund të shmanget kjo, nga një perspektivë teknologjike”, tha Sebastian Semiatkovski.

Se inteligjenca artificiale mund t’i zëvendësojë njerëzit, por që njerëzit janë ende një fuqi punëtore më e përshtatshme, tregohet pikërisht nga shembulli i kompanisë së tij. Klarna ka filluar ta përdorë këtë teknologji intensivisht, dhe Semiatkovski fillimisht u mburr se chatbot-et e tyre të inteligjencës artificiale mund të bënin punën e deri në 700 personave – prandaj ata filluan të pushonin nga puna dhe ndaluan punësimin, gjë që çoi në një ulje të ndjeshme të numrit të punonjësve.

Megjithatë, ai kohët e fundit ndryshoi mendje – duke vënë në dukje se niveli i kënaqësisë së klientëve me “IA” nuk është në nivelin e kërkuar, kështu që kompania do t’i drejtohet përsëri njerëzve. Edhe pse “IA” do t’u përgjigjet ende disa pyetjeve, Semijatkovski theksoi se për ata që duan një përvojë njerëzore në mbështetjen e klientëve – punonjësit e “Klarna” do të mbeten në dispozicion.

Për më tepër, njoftoi se do të përdorë njerëz si pjesë të të ashtuquajturës “mbështetje ndaj klientëve VIP” – domethënë, përdoruesit që paguajnë më shumë do të kenë mundësinë të flasin me punonjës të vërtetë në vend të inteligjencës artificiale.

Ndërsa shumë janë pesimistë, dhe Semiatkovski thotë se dëshiron të jetë i ndershëm dhe të flasë hapur në mënyrë që shoqëria të mund të përgatitet me kohë, disa – si Sundar Pichai – janë mjaft optimistë. Drejtori ekzekutiv i Alphabet dhe Google beson se nuk ka arsye për t’u frikësuar nga shkurtimet e vendeve të punës për shkak të Inteligjencës Artificiale, sepse kjo teknologji, sipas tij, në fakt do të rrisë kërkesën për punë.