Sofja zyrtare do vazhdojë t’i mbështesë klubet bullgare

Sofja zyrtare do të mbështesë klubet kulturore bullgare në vend, pavarësisht vendimeve që do marrin. Nga Ministria e Punëve të Jashtme bullgare informojnë se ka dy mundësi – klubet të ndryshojnë emrat ose të kërkojnë drejtësi përmes gjykatave. Nga Sofja më herët theksuan se ndryshimet e reja në Ligjin për Shoqatat shkelin të drejtën e grumbullimit. Ata nuk besojnë se do ndryshojë diçka paralajmërimi se ndryshimet ligjore do të dërgohen në Komisionin e Venecias.

“A do të mundet Komisioni i Venecias të pengojë përmbushjen e ligjit – praktikisht jo, sepse vendimet e Komisionit të Venecias janë këshillimore dhe jo të detyrueshme. Gjithashtu, një Qeveri e përgjegjshme, kur synon të kërkojë një mendim nga Komisioni i Venecias, duhet ta bëjë këtë tani, kur është ende projektligj dhe jo kur ligji të miratohet”, deklaroi Zheljazko Radukov – kryeekspert i Ministrisë së Punëve të Jashtme të Bullgarisë.

Nga ana tjetër, ekspertët vendas besojnë se Komisioni i Venecias do ta konfirmojë tekstin e miratuar të ligjit. Sipas akademikut Vllado Kambovski, ky komision nuk do të dalë kundër ndalimit të shoqatave që përhapin urrejtje nacionale.

“Pres që Komisioni i Venecias të konfirmojë qëndrimin e tillë. Nuk besoj se ajo do thotë “po, ju mund të krijoni shoqata që do të përhapin urrejtje apo mostolerancë nacionale”. Asnjë vend në botë nuk e lejon këtë. Ajo është kundër të gjitha standardeve dhe normave ndërkombëtare”, u shpreh Vllado Kambovski – akademik.

Nga Qeveria ditë më parë thanë se teksti i ligjit do t’i nënshtrohet shqyrtimit nga Bashkimi Evropian dhe nuk presin korrigjime shtesë. Teksti i ri i ligjit u miratua në Kuvend me mbështetjen e deputetëve të shumicës dhe opozitës. Ligji parasheh që klubet me emra të diskutueshëm, si “Ivan Mihajllov” dhe “Car Boris III”, të riemërohen./Alsat.mk