Boksieri britanik Tajson Fjuri, ish-kampion bote në peshën e rëndë, thotë se është i vetmi njeri që mund t’i japë fund mbretërimit të Oleksandr Usyk. Ukrainasi u shpall së fundi për të dytën herë si kampion i padiskutueshëm i këtij Divizioni, pas fitores me KO në “Wembley” ndaj Daniel Dubua.
Fjuri ka pësuar dy humbje me pikë ndaj Usyk, të cilat ende vihen në dyshim nga ylli britanik, i cili mbetet i sigurt se mund ta rrëzojë 38-vjeçarin e pamposhtur. Në një postim të mbushur me fjalë të ashpra në Instagram, Fury potencoi se kush është kundërshtari i vërtetë për ukrainasin.
“Një përshëndetje e madhe për Oleksandr Usyk. Ai bëri një performancë fantastike ndaj Daniel Dubua, një djalosh i mirë, i ri, i cili erdhi për një ndeshje të mirë. Urime të dyve, por Usyk e di se ka vetëm një njeri që mund ta mposhtë atë. Unë e kam bërë dy herë më parë dhe bota e di këtë”, shtoi më tej Fjuri, që nuk i pranon dy humbjet ndaj ukrainasit.
Fjuri u tërhoq nga sporti pas humbjes në ndeshjen e kthimit, në dhjetor ndaj Usyk, por 36-vjeçari ka vijuar stërvitjen dhe është gati për rikthimin. Kohët e fundit ka postuar pamje të vetes përsëri në palestër me trajnerin SugarHill Stjuart, në formë dhe gati për të dueluar.
“Jam duke vrapuar në rrugë. U ktheva në shtëpi. E bëra punën time dhe e mora veten përsëri. Unë jam burri. Unë jam spartani. Pavarësisht se çfarë do të thotë dikush, unë i fitova ato ndeshje, të garantuara, 100%“, shtoi Fjuri.
