Talebanët pranë krijimit të një qeverie të re në Afganistan

Talebanët janë shumë pranë krijimit të një qeverie të re në Afganistan. Por, njoftimi zyrtar i një administrate të re, nuk ka ardhur ende.

Korrespondentja ndërkombëtare e Euronews, Anelise Borges ka siguruar një listë me 13 emra dhe tituj që ka të ngjarë të jenë pjesë e ekzekutivit të ri në Afganistan.

Ai përfshin Mullah Abdul Ghani Baradar, që ka të ngjarë të emërohet si kryeministër i ardhshëm dhe Sheik Hibatullah Akhundzada, i cili do të emërohet të shtunën si udhëheqësi suprem i Emiratit Islamik të Afganistanit nën sundimin taleban.

Ndërkohë, grupi militant po përballet me presionin e brendshëm për të përmbushur premtimin e tij për të krijuar një shoqëri të moderuar dhe gjithëpërfshirëse.

Disa gra protestuan pranë pallatit presidencial në Kabul herët të premten duke kërkuar qasje të barabartë në punë, arsim dhe të jenë pjesë e qeverisë së re.

“Ne kemi frikë, por duhet të luftojmë”, tha protestuesja Mona Hossaini për Euronews. “Ne do të vdesim, nëse gjaku ynë do u japë jetë njerëzve të tjerë, është mirë për ne. Ne po luftojmë për këtë”, shtoi ajo.

Hossaini tha se mbështetësit meshkuj në protestë u rrahën nga talebanët.

Talebanët kanë premtuar se do të jenë një forcë e moderuar dhe gjithëpërfshirëse, duke theksuar se vendi është “i sigurt, për të gjithë”.

“Jeta e njerëzve, pronat, të gjitha janë të sigurta. Dhe ata që kanë shkuar jashtë vendit mund të kthehen në Afganistan”, u shpreh Pashtoon, një luftëtar taleban për Euronews.

“Nëse Zoti dëshiron, ne do t’i bëjmë të gjitha së bashku. Kjo është detyra jonë. Ne do t’i shërbejmë kësaj toke dhe më pas t’i shërbejmë vendit. Kjo është detyra jonë”, përfundoi ai.