Talibanët “zhdukin” ministrinë e Grave dhe u ndalojnë hyrjen

Talebanët u kanë ndaluar hyrjen punonjëseve gra në Ministrinë për Gratë në Kabul pasi morën kontrollin e Afganistanin muajin e kaluar. Pas tërheqjes së amerikanëve, ata u ndaluan grave hyrjen dhe sot tashmë e kanë zëvendësuar departamentin me “policinë e moralit”.

Një grup punonjësish në kryeqytetin afgan mbuluan shenjat e ministrisë së Grave me një zëvendësim në një përzierje të gjuhës Dari dhe arabisht. Në tabelat e reja u shkrua “Ministria e Lutjes dhe e Promovimit të Virtytit dhe Parandalimin e Vesit.”

Punonjëset janë shprehur se ishin përpjekur të ktheheshin në punë për disa javë, por si përgjigje atyre u kërkua që të ktheheshin në shtëpi. Portat e ndërtesës u mbyllën përfundimisht të enjten, tha njëra nga gratë.