“Tarifat”, liderët botërorë kanë reaguar ashpër ndaj presidentit amerikan Tramp

Gazetare: Linda Ebibi

Vendimi i presidentit amerikan, Donald Trump, për të vendosur tarifa ndaj të gjitha vendeve, ka nxitur reagime në mbarë botën, për shkak të pasojave të mëdha ndaj ekonomive. Bashkimi Evropian paralajmëroi kundërmasa.

“Miliona qytetarë do të përballen me fatura më të larta ushqimore. Mjekimi do të kushtojë më shumë, po ashtu edhe transporti. Inflacioni do të rritet. Dhe kjo po dëmton veçanërisht qytetarët më të cenueshëm. Të gjitha bizneset, të mëdha dhe të vogla, do të vuajnë që nga dita e parë, nga pasiguria e madhe deri te ndërprerja e zinxhirëve të furnizimit. Ne kemi qenë gjithmonë të gatshëm të negociojmë me Shtetet e Bashkuara për të hequr barrierat e mbetura për tregtinë transatlantike. Në të njëjtën kohë, ne jemi të përgatitur të përgjigjemi. Tashmë jemi duke finalizuar paketën e parë të kundërmasave në përgjigje të tarifave ndaj çelikut dhe tani po përgatitemi për kundërmasa të mëtejshme për të mbrojtur interesat tona dhe bizneset tona”, deklaroi Ursula von der Leyen, Presidente e Komisionit Evropian.

Masa paralajmëroi edhe Britania e Madhe.

“Do të ketë një impakt ekonomik nga vendimet që SHBA ka marrë, si këtu ashtu edhe në ekonominë botërore. Por dua të jem shumë i qartë, ne jemi të përgatitur. Askush nuk do të fitojë në një luftë tregtare. Kjo nuk është në interesin tonë kombëtar. Ne kemi një marrëdhënie të drejtë dhe të balancuar me Amerikën”, u shpreh Keir Starmer, Kryeministër i Britanisë së Madhe.

Edhe Kina ka premtuar kundërmasa ndaj tarifave të Trump.

Kryeministrja e Italisë, Meloni i ka quajtur tarifat e SHBA-së “të gabuara” duke paralajmëruar një luftë tregtare. Nuk mungoi as qëndrimi zyrtar i Zvicrës. Ata thonë se së shpejti do ti përcaktojnë hapat që do të ndërmarrin për të reaguar ndaj tarifave. Ndërkaq jashtë tarifave të SHBA-së kanë mbetur Rusia, Bjellorusia, Kuba dhe Koreja e Veriut. /Alsat.mk