Tifozi bullgar në gjendje stabile, MPJ: Punohet për identifikimin e autorëve

Gazetar: Lluka Andreev

Po merren të gjitha masat për identifikimin e sulmuesve, siguron shefi i diplomacisë, Bujar Osmani, pasi një tifoz i klubit bullgar Levski përfundoi në Qendrën Emergjente i lënduar nga goditja me thikë. Shtetasi bullgar tani është në gjendje të mirë shëndetësore. Sipas ministrit, tifozët jetojnë në një botë të ndarë dhe ngjarjet mes tifozëve nuk duhet të futen në kontekst politik dhe kushdo që e bën këtë dhe dëshiron të fitojë pikë politike, siç theksoi Osmani, nuk ka qëllim të mirë për marrëdhëniet dypalëshe mes Shkupit dhe Sofjes.

“Prandaj nuk do të përpiqem të bëj një korrelacion midis asaj që ndodhi mes tifozëve të Levskit dhe Shkupit dhe marrëdhënieve midis Republikës së Maqedonisë së Veriut dhe Republikës së Bullgarisë apo ndonjë marrëdhënie tjetër”, tha Bujar Osmani – Ministër i Punëve të Jashtme.

Osmani beson se etnia nuk ishte motiv për sulmin dhe përsëriti se MPJ e dënon dhunën. Më parë kishte mbërritur një dënim nga Ministria e Jashtme e Bullgarisë.

“Na vjen keq që fryma pozitive dhe sportive e ndeshjes ndërmjet KF “Levski” dhe KF “Shkupi” u trazua nga aktet e agresionit jashtë fushës së futbollit. Presim që autoritetet kompetente në Republikën e Maqedonisë së Veriut të ndërmarrin veprimet e nevojshme për hetim efikas dhe zbatim të drejtësisë në lidhje me incidentin e rëndë. Edhe një herë, ne theksojmë rëndësinë thelbësore të marrjes së masave efektive për të parandaluar akte të tilla agresioni dhe për të garantuar sigurinë e të gjithë qytetarëve”, thonë nga MPJ e Bullgarisë.

Ngjarjen e komentoi edhe kryeministri bullgar Nikolai Denkov, sipas të cilit sporti duhet të bashkohet dhe agresioni është krejtësisht i papranueshëm. /Alsat.mk