Trigliceridet mund të luajnë një rol të rëndësishëm në metabolizmin e trurit
Trigliceridet mund të luajnë një rol të rëndësishëm në metabolizmin e trurit
Ndërsa glukoza njihet gjerësisht si karburanti kryesor për trurin, studiuesit nga Weill Cornell Medicine kanë treguar se aktiviteti elektrik në sinapset e trurit mund të nxisë përdorimin e pikave yndyrore (triglicerideve) si burim energjie.
Studimi, i botuar në Nature Metabolism, sfidon bindjen e gjatë se “truri nuk djeg yndyrë”, tha dr. Timothy A. Ryan, profesor në biokimi dhe biokimi të anesteziologjisë në Weill Cornell. Autori kryesor, dr. Mukesh Kumar, tha se ka kuptim që yndyra të përdoret si burim energjie në tru, ashtu si në inde të tjera që kërkojnë shumë energji, si muskujt.
Vëmendje të veçantë iu kushtua gjenit DDHD2, që kodon për një lipazë, enzimë që ndihmon në shpërbërjen e yndyrës. Mutacionet në këtë gjen lidhen me një formë trashëgimore të paralizës spastike, që shkakton dobësi në këmbë dhe probleme njohëse. Studime të mëparshme kanë treguar se kur ky enzimë bllokohet te minjtë, truri grumbullon trigliceride.
Kjo shtyu studiuesit të hetonin nëse këto pika yndyrore mund të përdoren si karburant, sidomos kur mungon glukoza. Dr. Kumar zbuloi se në sinapset që përmbanin trigliceride, neuronet i shpërbëjnë këto në acide yndyrore dhe i dërgojnë në mitokondri, “fabrikat” e energjisë qelizore, për të prodhuar ATP, molekulën që furnizon qelizat me energji.
“Kjo aftësi për të përdorur yndyrën varet nga aktiviteti elektrik i neuroneve,” tha dr. Ryan. “Kur neuroni është aktiv, procesi ndodh; kur është në pushim, jo. Kjo më habiti.”
Në një eksperiment tjetër, studiuesit bllokuan një enzimë tjetër, CPT1, që ndihmon në transportimin e acideve yndyrore në mitokondri. Bllokimi i saj pengoi trurin të përdorte pikën yndyrore, çka çoi në një gjendje të ngjashme me hibernimin: temperatura trupore ra dhe zemra ngadalësoi.
“Kjo na tregoi se truri ka nevojë aktive për të përdorur këto pika yndyrore,” tha dr. Ryan.
Këto zbulime mund të nxisin kërkime të reja për sëmundjet neurodegjenerative, sidomos pasi nivelet e glukozës bien me plakjen apo në sëmundje të trurit. Acidet yndyrore mund të ndihmojnë për të ruajtur furnizimin me energji. Disa prova madje sugjerojnë se akumulimi i pikave yndyrore mund të ndodhë edhe te sëmundja e Parkinsonit.
Sipas studiuesve, nevojitet më shumë njohuri mbi ndërveprimin mes glukozës dhe lipideve në tru për të kuptuar më mirë neurodegjenerimin dhe për të gjetur mënyra për të mbrojtur trurin. / Medicalxpress
