Trump paralajmëron bisedime me Kinën për TikTok

Presidenti i SHBA-së, Donald Trump tha se do të fillojë të flasë me Kinën të hënën ose të martën rreth një marrëveshjeje të mundshme për TikTok.

Trump njoftoi se SHBA “pothuajse” ka një marrëveshje për shitjen e aplikacionit të videove të shkurtra, shkruan Reuters.

“Mendoj se do të fillojmë të hënën ose të martën… duke folur me Kinën, ndoshta me presidentin Xi ose me një nga përfaqësuesit e tij, por do të kishim një marrëveshje”, tha Trump.

Bëhet e ditur se muajin e kaluar, presidenti amerikan zgjati deri më 17 shtator një afat për ByteDance me seli në Kinë për të shitur asetet amerikane të TikTok.

Një marrëveshje ishte në përgatitje këtë pranverë për të ndarë operacionet e TikTok në SHBA në një kompani të re me seli në SHBA, me shumicë në pronësi dhe të operuar nga investitorë amerikanë, por u pezullua pasi Kina tregoi se nuk do ta miratonte atë pas njoftimeve të Trumpit për tarifa të larta mbi mallrat kineze.