“Unë jam deputet bllokues”, shoqëria civile aksion para Kuvendit

Pjesëtarë të organizatave të shoqërisë civile në Kosovë kanë protestuar në hyrje të Kuvendit teksa deputetët e zgjedhur u mblodhën për herë të 37-të dhe prapëseprapë dështuan ta bëjnë Kuvendin e ri, katër muaj pas mbajtjes së zgjedhjeve parlamentare të 9 shkurtit, duke e lënë vendin pa institucione të reja. Derisa deputetët po hynin në ndërtesë, pjesëtarë të organizatave të shoqërisë civile u rreshtuan pranë hyrjes duke mbajtur në dorë pankarta me mbishkrime si, “Deri kur?”, “Boll!”, “Unë jam deputet/e bllokues/e”, “Cirku i Republikës së Kosovës”, “Karriget janë për punë, jo për pushtet”, “Loja juaj, pasojat tona” dhe “Deputetë veç në letër”, etj. Eugen Cakolli nga Instituti Demokratik i Kosovës, i kritikoi deputetët për mungesë përgjegjësie dhe e përshkroi bllokadën si “tragjikomike”.

“Kjo gjendje i ka tejkaluar kufijtë dhe është bërë boll, siç thonë edhe pankartat tona. Të vetmëve që nuk po u bëhet vonë, duket se janë deputetët, të cilët me një papërgjegjësi të plotë janë duke e trajtuar situatën e tanishme si diçka të zakonshme, ndonëse situata nuk është e tillë….Deputetët mblidhen vetëm për disa minuta punë dhe i marrin pagat. Prandaj, ne, si organizata të shoqërisë civile, besojmë se është koha e fundit që deputetët t’i thërrasin arsyes dhe të arrijnë marrëveshje politike për t’i dhënë fund krizës politike”, deklaroi Eugen Cakolli, Instituti Demokratik i Kosovës. /Alsat.mk