Qarkullimi në urën rrethore nuk organizohet si rrethrrotullim, por thjesht dy karrexhatë, një për çdo drejtim, ndahen në mbërritje tek ura dhe pas gjysmërrethit, rilidhen dhe vazhdojnë të ecin paralelisht.

Pse (në) një rreth?

E pazakontë dhe fotogjenike, kjo urë ka mahnitur mediat sociale për një dekadë dhe është projektuar nga Rafael Viñoly Architects me disa qëllime në mendje. E para, natyrisht, ishte lejimi i kalimit të shpejtë të makinave nëpër lagune. Para se të ndërtohej ura, kjo bëhej duke përdorur skela të motorizuara që mund të strehonin vetëm një automjet në të njëjtën kohë, kështu që arritja në anën tjetër të lagunës ishte shumë më e ngadaltë dhe më e komplikuar.

Qëllimi i dytë ishte ruajtja e biodiversitetit dhe forma rrethore u tregua një zgjidhje e mirë për këtë. Gjegjësisht, struktura unazore e urës lejon që pjesa e lagunës nën urë të ekspozohet ndaj dritës së diellit dhe të mos jetë vazhdimisht në errësirë. Laguna e Garzonit është një zonë me rëndësi të madhe ornitologjike, ajo është shtëpia e llojeve të shumta të shpendëve, duke përfshirë flamingon kilian, si dhe amfibët e rrezikuar si bretkosa e Darvinit.

Arsyeja e tretë pse kjo urë është rrethore është siguria. Dalja nga rruga në një kthesë të madhe ju detyron të ngadalësoni shpejtësinë, ndërsa një rrugë e sheshtë dhe e pastër “inkurajon” shoferët të godasin pedalin e gazit dhe të ngasin më shpejt seç duhet. Dhe së fundi, edhe pse shoferëve mund të mos ju pëlqejë, pasagjerët do të shijojnë më shumë pamjen e lagunës me shpejtësi më të ulëta, dhe ka edhe vende për t’u ulur, për të shijuar dhe për të peshkuar buzë urës.

Ndërtimi i kësaj ure tërheqëse, e cila kushtoi më shumë se 10 milionë euro, filloi në shtator të vitit 2014, ndërsa ura u hap për publikun në fund të vitit 2015. Është bërë nga më shumë se 450 tonë hekur dhe tre mijë e gjysmë metër kub beton. Diametri i unazës është 202 metra, dhe ura është mjaft e lartë për të lejuar lundrim të papenguar nën të.