Vërshimet në Kosovë, evakuohen banorët e Vushtrrisë
Banorët e një pjese të Komunës së Vushtrrisë janë evakuuar, pasi lumi Sitnica ka dalë nga shtrati, duke shkaktuar vërshime, njoftoi kreu i kësaj komune, Xhafer Tahiri. Tahiri tha se gjendja “është e rënduar” dhe se në evakuimin e banorëve ka ndihmuar edhe Forca e Sigurisë së Kosovës.
“Shkolla fillore ‘Naim Frashëri’ në qytet është duke u bërë gati për strehim për qytetarët që kanë nevojë”, tha Tahiri.
Të hënën, kryeministri në detyrë i Kosovës, Avdullah Hoti ka thënë se do të evidentohen dëmet e shkaktuara nga vërshimet në pronat private dhe publike. Ndërkaq, Instituti Hidrometeorologjik i Kosovës ka thënë se situata meteorologjike pritet të stabilizohet në ditët në vijim.
