Zelensky: Jemi gati të dorëzojmë ushtarët e Koresë së Veriut për ukrainasit e kapur në Rusi

“Përveç ushtarëve të parë të kapur nga Koreja e Veriut, padyshim që do të ketë edhe më shumë”. Është vetëm çështje kohe para se ushtarët tanë të arrijnë të kapin të tjerët”, shkroi Zelensky në Platformën X.

Zelensky vuri në dukje se kapja e dy ushtarëve të Koresë së Veriut në vijën e frontit dha një pasqyrë të rrallë të rolit të tyre dhe përfshirjes së Phenianit në pushtimin rus të Ukrainës, raportoi Reuters.

Ukraina tha të shtunën se kishte kapur dy ushtarë të Koresë së Veriut në rajonin Kursk të Rusisë, skenë e luftimeve intensive që kur Ukraina nisi një ofensivë ndërkufitare pesë muaj më parë.

Pas arrestimit të tyre, Zelensky tha se Ukraina do t’u jepte gazetarëve akses tek ushtarët e kapur të Koresë së Veriut, në mënyrë që bota “të mund të zbulojë të vërtetën për atë që po ndodh”, raportoi Guardian.

Të burgosurit u dërguan në Kiev dhe iu dha kujdesi i duhur mjekësor, dhe presidenti ukrainas më vonë lavdëroi parashutistët dhe grupin taktik që i nxori nga Kursk, duke thënë se “nuk ishte një detyrë e lehtë”.

Kjo është hera e parë që ushtarët e Koresë së Veriut janë kapur që kur ata filluan stërvitjen për luftën në Ukrainë vjeshtën e kaluar.

Vlerësimet ukrainase dhe perëndimore thonë se rreth 11,000 trupa të aleatit rus, Koresë së Veriut, janë vendosur në rajonin Kursk të Rusisë për të mbështetur forcat e Moskës. Deri më tani, Rusia nuk e ka konfirmuar dhe as mohuar praninë e tyre në front.