Zelensky tregon kthimin e dhjetë ukrainasve të liruar nga burgjet ruse

Presidenti Volodymyr Zelensky ka treguar minutat e para pasi dhjetë ukrainas të liruar nga robëria ruse u kthyen në shtëpi.

Ai ka publikuar një video përkatëse në kanalin e tij Telegram, transmeton Ukrinform, përcjell Telegrafi.

Shërbimi i Sigurisë së Ukrainës (SBU) tregoi gjithashtu pamjet e takimit të parë të të burgosurve ukrainas në kufirin me Bjellorusinë.

“Ky është rezultat i punës së Qendrës së Përbashkët për Koordinimin e Kërkimit dhe Lirimit të të Burgosurve të Luftës, e cila zbatoi vendimin e Shtabit Koordinues për trajtimin e të burgosurve të luftës, jeta e çdo ukrainasi është vlera më e lartë. Ne po punojmë për të përmbushur udhëzimet e Presidentit të Ukrainës dhe për të kthyer çdo ukrainas nga robëria”, tha SBU.

Raportet e mëparshme thanë se Ukraina kishte kthyer në shtëpi dhjetë qytetarë të tjerë ukrainas nga robëria ruse.