Zgjedhjet e 11 majit, Berisha bën thirrje: Ftoj çdo parti që ndjehet opozitare të na bashkohet, lërini problemet me njëri-tjetrin

Kreu i PD, Sali Berisha u ka bërë thirrje partive të vogla opozitare që t’i bashkohen Partisë Demokratike.

“Koha është për një front sa më të gjerë opozitar, ndaj dhe unë ftoj të gjitha forcat politike që e ndjejnë veten opozitë, e konsiderojnë veten opozitë, pavarësisht nga çdo kundërshti që mund të kenë njëri me tjetrin, të bashkohen në këtë front për t’u përballur me sukses me këtë të keqe që kemi përpara. Sepse ky bashkim ka një rëndësi vendimtare.

Ka prej tyre që kanë shumë vërejtje për këtë forcë apo atë forcë, kanë vërejtje për PD-në, normale janë këto, por problemi është se nuk ka rrugë tjetër përveç bashkimit për t’u përballur me këtë të keqe që kemi përpara. Dhe të gjitha variantet e tjera, vetëm sa pjesëtojnë fuqinë e opozitës. Lërini problemet me njëri-tjetrin”, tha Berisha.