13 paqeruajtës ndërkombëtarë u vranë gjatë luftimeve në lindje të Kongos
13 paqeruajtës ndërkombëtarë u vranë gjatë luftimeve në lindje të Kongos
Të paktën 13 paqeruajtës dhe ushtarë të huaj kanë humbur jetën si pasojë e përleshjeve me grupin rebel M23 në Kongon Lindore, sipas zyrtarëve të Kombeve të Bashkuara dhe ushtrisë lokale. Rebelët M23, të cilët kanë fituar terren në javët e fundit, kanë rrethuar qytetin strategjik të Gomës, një qendër rajonale me mbi dy milionë banorë.
Këshilli i Sigurimit i OKB-së ka thirrur një takim urgjent mbi përshkallëzimin e dhunës, që do të mbahet të dielën, pas kërkesës së qeverisë së Kongos.
Ushtria e Kongos njoftoi se ka ndaluar një ofensivë të M23 drejt Gomës me ndihmën e forcave aleate, përfshirë trupat e OKB-së dhe ato të SAMIDRC (Misioni i Komunitetit të Zhvillimit të Afrikës Jugore).
Sipas Amnesty International, grupi M23, i cili thuhet se mbështetet nga Ruanda, po përfiton nga situata e ndërlikuar ndërkombëtare për të përparuar në territorin kongolez, duke vënë në rrezik civilët.
Ruanda ka mohuar akuzat për mbështetje ndaj M23, por ka pranuar praninë e trupave të saj në Kongon Lindore, duke argumentuar se këto veprime synojnë mbrojtjen e sigurisë kombëtare.
Ndër viktimat janë dy paqeruajtës nga Afrika e Jugut, një ushtar nga Uruguai dhe tre nga Malavia. Gjithashtu, shtatë ushtarë nga SAMIDRC humbën jetën gjatë përleshjeve.
Forcat paqeruajtëse të OKB-së (MONUSCO), të pranishme në Kongo për më shumë se dy dekada, vazhdojnë të përballen me sfida të mëdha në një mision që synon të stabilizojë rajonin dhe të mbrojë civilët.
