Hulumtim: Ndotja e ajrit, rritë numrin e vdekjeve

Pesëmbëdhjetë për qind e vdekjeve nga virusi Korona në botë, mund të jenë për shkak të ajrit të ndotur, thonë shkencëtarët nga Gjermania dhe Qiproja. Studimi i tyre tregon se në rajonet më të ndotura, vdekshmëria nga Kovid 19 është më e lartë. Në vendin tonë, qytetarët ngulfaten nga ajri i ndotur. Stacionet matëse tregojnë në nivel të lartë të ndotjes në Shkup, Kumanovë, Kavadar, Veles. Në këto qytete u matën midis 170 dhe 260 mikrogramë të grimcave PM 10 në ajër. Ajri më i ndotur ishte në Lisiçe të Shkupit, ku u matën 269 mikrogramë PM 10. Pas reagimeve të banorëve të Shkupit për ndotjen e ajrit, kryetari i qytetit të Shkupit tani për tani është vetëm i shqetësuar për këtë.

https://www.youtube.com/watch?v=MUMzN3akKrY&feature=youtu.be

Këtë vit, për fat të keq, të gjithë jemi në një pozitë më të ndjeshme, duke pasur parasysh pandeminë, dhe shqetësimi im personal është për gjendjen me ndotjen e ajrit dhe ndjeshmëria e opinionit absolutisht është e kuptueshme – deklaroi Petre Shilegov, Kryetar i Shkupit.

Ministri i Mjedisit Jetësor, Naser Nuredni përmes ndryshimeve ligjore do ta zvogëlojë ndotjen. Ai në emisionin 200 në Alsat u shpreh optimist në lidhje me rritjen e gjobave për ndotësit. Në këtë luftë, Ministri pret që edhe komunat të përfshihen më aktivisht.

Masat nuk mjaftojnë që të tejkalohet problemi me ndotjen- reagojnë OJQ-të. Kërkojnë të ndalohet përdorimi i qymyrit kurse aty ku ka djegie, nuk matet ndotja. Aktivistë në Novaci me instrumente matëse tentonin të gjejnë vend në afërsi të “TEC Manastirit” që nuk është i ndotur. Edhe në kodrën e afërt të fshatit, kishte ndotje të ajrit.

Deri tani nuk kemi hasur në reagim pozitiv për vendosjen e stacioneve matëse në komunën Novaci, konkretisht ku është kjo situatë. Informatat e fundit janë në pajtim me lejen ekologjike për Kombinatin energjetik TEC Manastiri, ata duhet të vendosin tre stacione matëse në atë komunë. Por ajo leje ekologjike po zvarritet me vite – tha Davor Pehçevski, ambientalist.

Sipas ambientalistëve, duhet të investohet më shumë në mënyrë që të fitohet beteja me ndotjen e ajrit, ndërsa institucionet të bashkëpunojnë mes vete.

Igor Stefanovski