Është jashtëzakonisht ngrohtë në Evropë për këtë periudhë të vitit, a është kjo normale?
Është jashtëzakonisht ngrohtë në Evropë për këtë periudhë të vitit, a është kjo normale?
Temperaturat e mëngjesit që arrijnë në 30 gradë Celsius në Spanjë gjatë tetorit mund t’i kenë kënaqur turistët, por ato kanë ngritur shqetësimin e shkencëtarëve.
Në të gjithë Evropën, nga Spanja në Suedi, temperaturat janë shumë të larta për këtë periudhë të vitit. Vera e kaluar do të mbahet mend për valët e të nxehtit në të gjithë Evropën, por temperaturat mbetën të larta në fillim të vjeshtës, gjë që është një shenjë e përshpejtimit të ndryshimeve klimatike.
Ky do të jetë tetori më i ngrohtë që nga viti 1961, kanë paralajmëruar meteorologët spanjollë.
“Një ose dy ditë me temperaturë mbi 30 gradë është normale për Spanjën. Por shumicën e ditëve nuk është kështu. Këto janë tashmë temperatura të verës dhe ne jemi thellë në vjeshtë”, thotë meteorologu spanjoll Ruben del Campo.
Valët e pazakonta të të nxehtit frymëzuan gjithashtu një fjalë të re në gjuhën spanjolle – “verono”, një kombinim i fjalëve verano (verë) dhe otono (vjeshtë). Del Campo thotë se në 10 vitet e fundit ka pasur një “përshpejtim të ndjeshëm” të ndryshimeve klimatike.
Franca, ashtu si Spanja, regjistroi një tetor më të ngrohtë se mesatarja. Është gjithashtu e ngrohtë shumë në veri në Suedi, ku një rekord prej 19.5 gradë u mat në Kristianstad të premten.
“Është temperatura më e lartë e regjistruar ndonjëherë në Suedi këtë fund të vitit,” shpjegon Erik Højgaard-Olsen, një meteorolog në Institutin Suedez Meteorologjik dhe Hidrologjik.
Kryeqyteti i Belgjikës, Brukseli, ka shënuar një temperaturë maksimale prej 24 gradë, që është 10 gradë mbi temperaturën e zakonshme për fundin e tetorit.
“Vështirë të besohet se fundi i tetorit në pjesën më të madhe të Evropës dhe Afrikës veriore është jashtëzakonisht i ngrohtë”, tha Organizata Botërore Meteorologjike në Twitter.
Pasojat e kësaj nuk janë aspak të mira, sipas meteorologut Ruben del Campo, duke treguar për nivelin e ulët të ujërave nëntokësore që është një lajm i keq për Spanjën, bujqësia e së cilës furnizon pjesën më të madhe të Evropës me fruta dhe perime.
Banorët dhe turistët që shijojnë plazhet e Barcelonës thonë se janë të vetëdijshëm për anën negative të motit kaq të nxehtë në këtë kohë të vitit.
“Jemi shumë të lumtur për motin e ngrohtë, na pëlqen. Por megjithatë, kjo nuk është normale”, thotë Fernando Raibas, një turist nga Galicia.
