Kreu i “SEC” paralajmëron: Përdorimi i inteligjencës artificiale mund të çojë në kriza të reja

Kreu i Komisionit Amerikan të Letrave me Vlerë (SEC), Gary Gensler, dërgoi një paralajmërim shqetësues në lidhje me inteligjencën artificiale dhe tregjet financiare.

Në një bisedë me “Financial Times”, Gensler theksoi se inteligjenca artificiale po depërton shpejt dhe fuqishëm në industrinë financiare, por që, sipas tij, nuk do të ketë saktësisht një rezultat pozitiv.

Është pothuajse e pashmangshme që inteligjenca artificiale të çojë në krizën e ardhshme financiare dhe ekonomike, tha Gensler dhe u kërkoi rregullatorëve të marrin masa në kohë për të reduktuar rreziqet që mund të shkaktojë inteligjenca artificiale në sektorin financiar.

Ai shpjegoi se është më i shqetësuar që kompanitë e teknologjisë, të mëdha dhe të vogla, po zhvillojnë modele të inteligjencës artificiale që synojnë industrinë financiare që janë jashtë mbikëqyrjes së rregullatorëve financiarë.

Nëse kompanitë financiare fillojnë të përdorin ato modele, kjo mund të nënkuptojë se ato fillojnë të marrin të njëjtat vendime në të njëjtën kohë, gjë që, beson ai, mund të çojë në katastrofa të mundshme të tregut.

Unë mendoj se në të ardhmen do të kemi një krizë financiare … dhe në raportet pas kësaj njerëzit do të thonë “Aha!” Kishte ose një grumbullues të dhënash ose një model në të cilin ne u mbështetëm”, tha Gensler. Ai shtoi se nuk e di nëse kjo do të ndodhë në bursë apo ndoshta në tregun e hipotekave.

Si kujtesë, kompanitë e mëdha financiare si Morgan Stanley dhe Goldman Sachs tashmë po përdorin në mënyrë aktive inteligjencën artificiale për të ndihmuar në kërkime ose për të hartuar tema për biseda me klientët, dhe JP Morgan Jayce po zhvillon një platformë që do t’i ndihmonte klientët të investojnë.

Për të gjitha këto ka reaguar edhe “SEC”, e cila në korrik propozoi një rregull të ri sipas të cilit ndërmjetësit dhe këshilltarët duhet të marrin në konsideratë dhe të reagojnë nëse ndodh një konflikt interesi për shkak të përdorimit të analizës së të dhënave parashikuese dhe teknologjive të ngjashme.

Por fakti është se inteligjenca artificiale po zhvillohet shumë më shpejt sesa legjislativët mund të nxjerrin ligje dhe rregullore.