Zidan: Rikthimi në Itali? Pse jo, çdo gjë mund të ndodh

Një ditë kujtimesh dhe emocionesh në Romë, ku është prezantuar dokumentari biografik për Marçello Lipin, “Tani fitoj unë”. Trajneri italian shkroi faqe të pashlyeshme të historisë së futbollit në stolin e Juventusit dhe padyshim në atë të kombëtares italiane. Ka kaq shumë futbollistë që kampioni i botës i ka drejtuar në karrierën e tij të gjatë.

Mes tyre është edhe Zinedin Zidan, i cili nuk ka dashur të mungojë në këtë event. Ish-mesfushori, i cili më pas filloi karrierën si trajner, foli për Sky Sport, duke iu rikthyer aventurës bardhezi.

“Marçello Lipi ishte ai që më bëri të vij tek Juventusi, i pari që besoi dhe më bëri të luaj. Nuk ishte e lehtë për të, unë erdha nga Franca, gjithçka ishte ndryshe, por Lipi më bëri të bëhesha ai që më pas u bëra”.

Më Zizu ka folur për karrierën e tij si trajner.

“Si lojtar kam pasur trajnerë të mëdhenj si Lipi apo Ançeloti, por më pas secili duhet të ndjekë rrugën e vet,” tha mes tjerash Zidan.

Një koment për të ardhmen ishte e pashmangshëm. Zidani së fundmi ka qenë i lidhur me Bajern Munihun, por në të kaluarën emri i tij është përmendur mbi të gjitha për Juventusin.

“Pse jo, çdo gjë mund të ndodhë. Për momentin jam duke bërë diçka tjetër, por është e sigurt që do të rikthehem në stol, do të më pëlqente,” tha në fund Zidan.

Trajneri, i cili nuk e ka fshehur asnjëherë dëshirën për të trajnuar kombëtaren franceze, nuk e përjashton një rikthim në Itali.