Alarm i kuq në rajon: Vala tropikale e të nxehtit po i afrohet Maqedonisë

Një alarm i jashtëzakonshëm meteorologjik është aktivizuar në të gjithë territorin e Serbisë për shkak të valës së fortë tropikale të të nxehtit, e cila nis nesër, më 26 qershor, dhe do të zgjasë deri të martën, më 2 korrik 2026. Kjo valë e të nxehtit tashmë po lëviz edhe në drejtim të Maqedonisë së Veriut.

Instituti Hidrometeorologjik Republikan i Serbisë (RHMZ) njoftoi se temperaturat e paralajmëruara do t’i afrohen 40 gradëve Celsius, duke paraqitur rrezik serioz për shëndetin e njerëzve dhe mjedisin.

Sipas parashikimeve zyrtare, që të premten temperaturat në rajon do të arrijnë deri në 36 gradë Celsius. Kulmi i kësaj vale të të nxehtit pritet gjatë fundjavës, kur termometrat në shumicën e zonave do të shënojnë nga 35 deri në 39 gradë Celsius.

Paralelisht me temperaturat ekstreme, është aktivizuar edhe alarmi i kuq për zjarre për shkak të rritjes drastike të rrezikut për përhapjen e shpejtë të tyre në hapësira të hapura.

Si zona më kritike konsiderohen ato ku ka mungesë kronike të reshjeve dhe deficit të lagështisë në tokë. Për këtë arsye, autoritetet u kanë bërë thirrje qytetarëve të tregojnë përgjegjësi maksimale, duke theksuar se edhe pakujdesia më e vogël në natyrë mund të shkaktojë dëme të mëdha mjedisore.

Mjekët rekomandojnë që qytetarët të shmangin ekspozimin e drejtpërdrejtë në diell nga ora 10:00 deri në 17:00, të konsumojnë sasi të mjaftueshme lëngjesh dhe t’i përshtatin aktivitetet e tyre me ditët e nxehta që po afrohen.