BE nën presion për miratimin e vaksinës nga Pfizer-BioNTech

Në Bashkimin Evropian po shtohet presioni për miratimin e vaksinës së kompanive Pfizer/BioNTech kundër koronavirusit pas miratimit të saj disa ditë më parë nga Britania, Shtetet e Bashkuara dhe Kanadaja. Rastet me koronavirus po rriten në të gjithë kontinentin, ndërsa Gjermania dhe Holanda kanë njoftuar mbylljen e vendit.

Britania e quajti dita V – ose dita e vaksinimit – 8 dhjetorin, fillimin e programit masiv të vaksinimit. Programi filloi në spitalet kryesore dhe aktualisht po zgjerohet tek klinikat lokale. Rreth 800 mijë doza të vaksinës nga Pfizer/BioNTech po shpërndahen ndërsa priten disa milionë doza të tjera deri në fund të muajit. Dr. Nikita Kanani është me Shërbimin Shëndetësor Kombëtar në Britani.

“Më pak se një vit më parë ne trajtuam pacientin e parë me COVID dhe tani jemi në gjendje të bëjmë vaksinën. Ekipi ka qenë i jashtëzakonshëm.”

Njerëzit mbi 80 vjeç, të rrezikuarit si dhe personeli mjekësor dhe në azilet e pleqve janë të parët që do të vaksinohen. Mjekët thonë se vaksinimi fillimisht i këtyre grupve të rrezikuara, do të lehtësojë presionin ndaj spitaleve. Por si ia arriti Britania të fillojë vaksinimin? Autoritetet theksojnë se janë kryer kontrolle të plota të sigurisë. June Raine drejton entin rregullator britanik për barnat dhe shëndetësinë.

“Pa dyshim që kjo vaksinë është shumë e sigurtë dhe efikase. Kjo do të na ndihmojë të tejkalojmë situatën.”

Sondazhet tregojnë se gjysma e publikut britanik ka shqetësime për sigurinë e vaksinës. Organizata Botërore e Shëndetësisë thotë se është thelbësore që komunikimi i qeverive të jetë i qartë. Soumya Swaminathan është me Organizatën Botërore të Shëndetit.

“Sa më të hapur dhe transparentë të jemi, aq më shumë ka të ngjarë që njerëzit të kenë besim dhe të duan që jo vetëm të vaksinohen, por edhe të ishin të durueshëm dhe të prisnin radhën e tyre.”

Ndërsa Britania, Shtetet e Bashkuara dhe Kanadaja kanë miratuar vaksinën nga Pfizer/BioNTech, në Bashkimin Evropian po shtohet presioni për të bërë të njëjtën gjë. Miratimi pritet nga fundi i dhjetorit.

“Duam ta bëjmë këtë në një mënyrë shumë të kordinuar dhe të tregojmë se të gjithë kanë qasje të njëjtë,” tha Kancelarja Angela Merkel.

Por kjo qasje nuk do të jetë në dispozicion për miliarda njerëz në botë. Agjencitë e ndihmave akuzojnë vendet e pasura për grumbullimin e vaksinave. Anna Marriott është menaxhere politikash shëndetësore me organizatën Oxfam.

“Nëntë nga dhjetë njerëz në vendet e varfëra nuk do të marrin vaksinën vitin që vjen dhe ndoshta për vite të tëra.”

Shkencëtarët thonë se normaliteti nuk do të kthehet deri sa vaksinimi të kryhet në shkallë globale. Dr. Sterghios Moschos është biolog molekular në Universitetin Northumbria.

“Rreth 70-80% e popullsisë botërore do të duhet të vaksinohet tani.”

Kjo do të kërkonte miliarda doza vaksine dhe ka të ngjarë të zgjasë disa muaj ose vite.