Biden kërkon veprim për kontrollin e armëve pas sulmit në Kolorado

Presidenti i SHBA Joe Biden bëri thirrje për veprim mbi kontrollin e armëve, një ditë pasi 10 persona u vranë në një supermarket në  Kolorado.

“Jemi ende duke pritur më shumë informacion në lidhje me aktin kriminal, motivin e tij dhe armët që ai përdori”, theksoi Biden.

“Nuk kam nevojë të pres asnjë minutë tjetër… për të marrë masa të arsyeshme që do të shpëtojnë jetë në të ardhmen dhe për t’i nxitur kolegët e mi në Dhomën e Përfaqësuesve  dhe Senat të veprojnë”, shtoi ai.

“Ne mund të ndalojmë edhe një herë armët luftarake me kapacitet të lartë në këtë vend. Unë e bëra atë kur isha senator. U miratua. Ishte ligji për kohën më të gjatë dhe i dha fund këtyre vrasjeve masive. Ne duhet ta bëjmë atë përsëri”, u tha presidenti gazetarëve.

Biden i kërkoi Senatit të SHBA të “miratojë menjëherë” dy projektligjet e miratuara tashmë nga Dhoma e Ulët me mbështetjen dypartiake “që mbyllin boshllëqet në sistemin e kontrollit të armëve”.