Blinkenit i vdes babai, emocionon me fjalët e ndjera

Babai i sekretarit amerikan të shtetit Antony Blinken, Donald, një ish-diplomat amerikan, bankier investimesh dhe koleksionist i artit modern, ka vdekur në moshën 96-vjeçare.

Lajmin e ka bërë të ditur Blinken përmes disa postimeve në Twitter, ndërsa po merrte pjesë në Asamblenë e Përgjithshme vjetore të OKB-së.
“Familja ime humbi një prind dhe gjysh, një burim dashurie dhe frymëzimi – babai im Donald Blinken”, shkroi ai.

“Një anëtar i Korpusit Ajror të Ushtrisë Amerikane, një ambasador i ShBA, president i Fondacionit Mark Rothko, (kryetar i bordit) i Universitetit Shtetëror të Nju Jorkut, babai i shërbeu qytetit, shtetit dhe vendit të tij”, tha më tej Blinken.

Donald Blinken vdiq paqësisht në shtëpinë e tij në East Hampton, Long Island, tha një zyrtar i Departamentit të Shtetit.

“Babi më frymëzoi për shërbimin publik”, shkroi Blinken.

“Ai jetoi me mirësjellje, dinjitet dhe modesti. Ai e donte gruan e tij Vera dhe familjen e tij. Ai ndërtoi një jetë të mrekullueshme dhe më dha një jetë të mrekullueshme. Të dua babi”.

Donald Blinken shërbeu si kryetar i sistemit të Universitetit Shtetëror të Nju Jorkut nga 1978 deri në 1990 dhe ishte ambasador i ShBA-së në Hungari nga 1994 deri në 1997, gjatë administratës së Bill Clinton.