Çellsi mëson çmimin e prishjes së kontratës së portierit francez me Milanin

Pas fitimit të trofeut të parë në Ligën e Konferencës, Çellsi ka filluar të përqendrohet te afati kalimtar veror. Klubi londinez synon të përforcojë skuadrën, jo vetëm për sezonin e ardhshëm, por edhe për Kupën e Botës për Klube që do të mbahet në Shtetet e Bashkuara.

Në këtë turne, Çellsi do të përballet me ekipe si: Los Angeles FC, Flamengo dhe Esperance Tunis. Një nga objektivat kryesorë të klubit është përforcimi në portë, dhe në listën e dëshirave është Majk Manjan.

Sipas gazetarit italian Xhanluka Di Marzio, Milani ka vendosur një çmim prej 30 milionë eurosh për portierin francez. Manjan ka qenë një nga pikat e forta të Milanit, ndërsa më parë ka luajtur edhe me Lille në Ligue 1. Portieri 28-vjeçar ka kontratë me Milanin deri më 30 qershor 2026, por një ofertë e mirë mund të ndryshojë planet.