Cikloni goditi ishullin francez të Majotit, dyshohet për qindra humbje jete

Qindra persona dyshohen të kenë humbur jetën si pasojë e ciklonit shkatërrimtar që goditi ishullin francez të Majotit në Oqeanin Indian. Shifrat zyrtare ende nuk dihen, por prefekti i ishullit deklaroi se “Numri i të vdekurve mund të arrijë afër një mijë apo edhe disa mijëra”. Ekipet e shpëtimit vazhdojnë përpjekjet të gjejnë të mbijetuarit. Cikloni shkaktoi dëme të mëdha në aeroportin e Majotit, goditi spitalet, shkollat dhe ndërpreu furnizimin me energji elektrike, ujë dhe lidhjet e komunikimit kur goditi territorin më të varfër të Francës. Cikloni solli erëra me shpejtësi prej të paktën 226 kilometrave në orë kur goditi Majotin. Ministri i Brendshëm i Francës udhëton sot në ishull me 160 ushtarë dhe zjarrfikës për të përforcuar ndihmat. Presidenti francez, Emmanuel Macron, do të mbajë një takim krize në Paris për katastrofën, njoftoi presidenca. /Alsat.mk