“Covid 19”, Gjokoviçi përjashtohet nga turneu i radhës
Novak Gjokoviç nuk do të mund të marrë pjesë në turneun e “Indian Uells”-it që zhvillohet në Amerikë duke nisur nga e mërkura e kësaj jave dhe që do të zgjasë deri më datë 19 mars.
Janë vetë organizatorët e turneut ata të cilët kanë zyrtarizuar këtë vendim në lidhje me tenistin serb, teksa në Amerikë ende është në fuqi ligji që ndalon këdo shtetas të huaj të të shkelë në SHBA pa qenë më parë i vaksinuar kundër “COVID-19”.
Në këtë formë, numri një i botës penalizohet sërish prej vaksinës kundër “COVID-19” teksa kujtojmë se serbi nuk mundi të luante edhe në “Australian Open” të vitit 2022. Një turne në të cilin u rikthye në vitin 2023, madje duke e fituar atë ndërsa koleksionoi trofeun e 22-të Grand Slam, po aq sa Rafael Nadal.
Së fundmi, Gjokoviç ishte duke kaluar një formë shumë të mirë duke lënë pas problemet fizike ndërsa mbërriti edhe në 20 ndeshje pa humbje, para se të mposhtej nga Daniil Medvedev në gjysmëfinalen e ATP Dubai.
Ndërkohë, me Gjokoviçin jashtë turneut të “Indian Uells”, ai që përfiton është Nikoloz Basilashvili që tashmë është pjesë e tenistëve që do të nisin kompeticionin Masters 1000 nga e mërkura e kësaj jave.
