E bujshme, Hamilton dhe Fetel në një ekip?!
Luis Hamilton rinovoi me një vit kontratën me skuadrën “Mercedes”, por çfarë do të ndodhë pas një viti? Sipas mediave britanike, 7 herë kampioni i botës mund të vazhdojë karrierën e tij në “Formula 1”, këtë herë duke garuar me makinën “Aston Martin”. Rregullat e reja që do të aplikohen nga viti i ardhshëm favorizojnë të gjitha makinat dhe pilotit britanik nuk i mungon përvoja për të bërë diferencën në pistë.
Skuadra e “Aston Martin” nuk e ka fshehur asnjëherë interesimin ndaj Hamilton, me shpresën për ta marrë në skuadër, ashtu sikurse bëri vjet me Sebastian Fetelin. Piloti gjerman, 4 herë kampion bote në “Formula 1”, la Ferrarin, për të vijuar karrierën me makinën e Aston Martin, ku do të debutojë këtë sezon.
“Nuk e mohoj se është një perspektivë tërheqëse. Hamilton është një kampion në cilëndo makinë ta ulësh. Jam i bindur se çdo makinë është gati ti ofrojë një kontratë, ndaj edhe ne mund ta provojmë një gjë të tillë. Gjithsesi, për momentin jemi përqendruar te ky sezon”, u shpreh pronari i Aston Martin, Lorens Stroll.
