Ekipi i Bidenit mirëpret fillimin e procesit të tranzicionit

Presidenti në largim i SHBA-ve Donald Trump dha dritë jeshile për fillimin e tranzicionit zyrtar të pushtetit. “Në interesin më të mirë të vendit tonë unë rekomandoj Emily Murhpy, kreun e Përgjithshëm të Administratës dhe ekipin e saj që të bëjnë atë që duhet duke iu referuar protokolleve fillestare”, theksoi Trump.

Administratorja Murphy tha se ajo po vinte 6.3 milionë dollarë fonde në dispozicion të presidentit të zgjedhur. Vendimi për transferimin e pushtetit do të thotë që ekipi i Bidenit më në fund mund të fitojë qasje në agjencitë federale, të komunikojë me zyrtarë dhe të përdorë paratë e financuara nga taksapaguesit për të ndihmuar një tranzicion të qetë. Vendimi gjithashtu lejon që Biden dhe zv/presidentja e zgjedhur, Kamalla Harris, të marrin informacione të rregullta të sigurisë kombëtare, të cilat i pranon edhe Trumpi.

Ekipi i Bidenit mirëpriti fillimin e procesit të tranzicionit. “Vendimi i sotëm është një hap i nevojshëm për të filluar trajtimin e sfidave me të cilat përballet kombi ynë, duke përfshirë vendosjen e pandemisë nën kontroll dhe ekonominë tonë përsëri në rrugën e duhur”, theksuan nga ekipi i presidentit të zgjedhur, Biden.

Biden shpalli një pjesë të emrave të këshilltarëve. Këshilltarin e tij të vjetër dhe diplomatin veteran, Anthony Blinken, do ta emërojë si Sekretar të Shtetit. Jake Sullivan, do të bëhet këshilltar i Sigurisë Kombëtare të Shtëpisë së Bardhë si dhe Ish-sekretari i Shtetit, John Kerry, do të emërohet i dërguar i posaçëm presidencial për çështjet e klimës dhe do të jetë pjesë e Këshillit të Sigurisë Kombëtare.

ALSAT