Evropa përfshihet nga flakët, Franca evakuon 10 mijë banorë
Zjarret në pyje po përhapen në të gjithë Evropën Jugore, duke detyruar mijëra njerëz të evakuohen nga shtëpitë e tyre dhe duke i shtyrë autoritetet të ndalojnë spektatorët të hyjnë në një fazë të garës së famshme të çiklizmit Tour de France.
Në Francën jugperëndimore, pranë qytetit të Perpignanit, 700 zjarrfikës, të mbështetur nga avionë të specializuar, luftuan për të vënë nën kontroll një zjarr “gjigant” që po përhapej në një zonë të vështirë për t’u arritur, me më shumë se 10,000 banorë të evakuuar. I nxitur nga erërat, nxehtësia intensive dhe ajri jashtëzakonisht i thatë, zjarri ishte pothuajse trefishuar në madhësi që nga mëngjesi i djeshëm, duke përpirë 4,600 hektarë.
Zjarret shpërthyen menjëherë pas një vale të nxehti në qershor, një nga më të këqijat në Evropë, e cila shkaktoi mijëra vdekje dhe do të kishte qenë “pothuajse e pamundur” pa ndryshimet klimatike, sipas një grupi shkencëtarësh nga organizata Botërore e Atribuimit të Motit.
Me temperaturat që pritet të rriten përsëri në ditët në vijim, autoritetet kanë shprehur shqetësimin se sezoni vjetor i zjarreve të verës ka filluar një muaj më herët.
“Sezoni do të jetë i gjatë, duhet të na ndihmoni”, tha koloneli i shërbimit francez të zjarrfikësve, Eric Belgioino, duke u bërë thirrje njerëzve pranë zjarreve në Pirenej të marrin masa paraprake.
Zjarret goditën gjithashtu Greqinë, Spanjën, Kroacinë dhe Shqipërinë.
Dy fabrika në Selanik të Greqisë u vunë në flakë gjatë fundjavës, duke i detyruar autoritetet të evakuojnë zonën përreth dhe duke urdhëruar familjet të mbajnë dritaret e mbyllura.
Në Spanjë, një zjarr pranë bregdetit verilindor të Costa Brava ka djegur më shumë se 2,200 hektarë në dy ditë, dhe zjarrfikësit thanë se përpjekjet e tyre do të ndërlikoheshin nga rritja e temperaturave dhe vatra të shumta të nxehta pranë flakëve.
Zjarret e mëdha kanë shkatërruar gjithashtu qindra hektarë pyje, vreshta dhe shkurre në ishullin kroat të Hvarit dhe në Tale të Shqipërisë.
Rajonet në të gjithë Portugalinë, Spanjën dhe Francën jugore kanë rritur paralajmërimet për nxehtësi për ditët në vijim. Vala e re e të nxehtit pritet të lëvizë në veri dhe meteorologët thonë se mund të zgjasë deri fundjavën e ardhshme.
