Francë: Politikani i së djathtës ekstreme favorit për të qenë në balotazh me Macronin
Një sondazh i ri e ka vënë analistin televiziv të ekstremit të djathtë Eric Zemmour përpara Marine Le Pen për të arritur në raundin e dytë të zgjedhjeve presidenciale franceze në prill të vitit të ardhshëm.
Zemmour, një drejtues i një emisioni polemist, pritet të përballet me presidentin aktual Emmanuel Macron në një balotazh për presidencën franceze. Ai nuk e ka shpallur zyrtarisht kandidaturën e tij, por e ka përshkruar veten si një “kandidat në debat” dhe pritet të njoftojë kandidaturën më vonë gjatë këtij viti.
Rritja e Zemmour në sondazhet e opinionit ka tronditur pritshmëritë e kahershme se votimi do të ishte një ripërsëritje e garës së vitit 2017 midis Macron dhe figurës shumëvjeçare të Le Pen.
Sondazhi i së premtes nga Ipsos Sopra Steria për gazetën franceze Le Monde është i dyti që e vendos Zemmour në balotazh.
Sondazhi i 16 mijë njerëzve të intervistuar nga 7-13 tetori e vendosi atë në 16-16,5 për qind të votave në raundin e parë, krahasuar me 15-16 për qind të Le Pen.
Macron kryesoi raundin e parë me 24-28 për qind.
Sondazhi nuk parashikoi rezultatin e raundit të dytë, por sondazhe të tjera e kanë parashikuar Macronin si fituesin përfundimtar.
Anketuesit vunë në dukje se Zemmour, i cili ka bindje për nxitje të urrejtjes racore, ishte më përçarës mes votuesve sesa Le Pen
