Fundjava e zgjatur nuk është shumë premtuese për Ohrin dhe Strugën për shkak të temperaturave të freskëta

Gazetar: Miki Trajkovski

Temperatura vjeshtore për 1 Maj në Ohër dhe Strugë. Në vend të skarës dhe piknikut në plazh, fundjava e zgjatur festive për turistët dhe banorët vendas do të kalojë me kafe dhe drekë në ndonjë nga objektet hotelierike. Ka mysafirë nga kudo, por jo si vitet e kaluara. Më të shumtë janë vendasit, të cilët kanë apartamentet e tyre të fundjavës këtu, si edhe ata nga vendet fqinje.

“Jemi nga Manastiri. Qëndrojmë tri net për 1 Maj, për festat. Me shëtitje. Ohri është qyteti më i bukur në Maqedoni. Ndezja tradicionale e skarës mendoj se, gjatë këtyre 35 viteve të fundit, është paksa demode”, tha një Turist nga Manastiri.

“Erdhëm më 25 prill dhe ikim më 2 maj. Ohri është super. E përshkuam të gjithë këtë pjesë të vjetër. U nisëm me anije deri te Shën Naumi, shkuam te Burimet e Biljanës. Pamë gjithçka që mendonim se duhej parë. Është shumë e këndshme për pushim”, thotë një Turiste nga Serbia.

“Jemi nga Gjermania. Është shumë mirë. Sa ditë do të qëndroni në Ohër? Pesë ditë”, theksuan Turistë nga Gjermania.

“ Ishim këtu para 15 vitesh dhe tani përsëri. Jemi të befasuar që pjesa e vjetër e qytetit ka mbetur e njëjtë, nuk është ndryshuar. Ka shumë njerëz dhe kemi përshtypje shumë të mira”, u shpreh një Turist nga Serbia.

“Ne jemi nga shoqëria kulturore sllovene ‘Aida’ nga Umagu, në Kroaci. Me gëzim të madh erdhëm këtu. Erdhëm rreth gjashtëdhjetë veta nga Umagu, Novi Grad, nga e gjithë ajo zonë. Disa prej nesh kanë qenë tashmë këtu, ndërsa disa jemi për herë të parë”, tha një Turiste nga Kroacia.

Më të njohurat janë lundrimet me anije nëpër liqen.

“Ofrojmë shëtitje panoramike rreth pjesës së vjetër të Ohrit dhe shëtitjet që janë më aktualet deri te Shën Naumi. Presim mjaft mysafirë gjatë fundjavës së zgjatur, por faktor i madh është edhe moti. A ju frikëson gjendja globale? Sinqerisht jo. Si do të ecë, do ta përballojmë; ne jemi këtu dhe do t’i ofrojmë më të mirën çdo mysafiri që është i gatshëm ta vizitojë vendin tonë”, deklaroi Marko Taseski, varkëtar.

Por punonjësit e turizmit thonë se ky 1 Maj do të jetë më i dobët me mysafirë për shkak të zhvillimeve aktuale globale.

“Ndikon veçanërisht edhe ajo që po ndodh në Lindjen e Mesme dhe paralajmërimet se do të vijnë vështirësi edhe më të mëdha ekonomike, kështu që njerëzit janë pak të frikësuar të udhëtojnë. Kryesisht kemi mysafirë vendas, të cilët për 1 Maj shumë prej tyre vinin, dhe që kanë apartamente për t’i rregulluar e për t’i përgatitur për sezonin e verës. Nga ana tjetër pati disa njoftime, por shumë prej tyre u anuluan. Edhe hotelet ankohen për numër të pamjaftueshëm mysafirësh krahasuar me pritshmëritë”, tha Vlado Sukloski, punonjës turizmi.

Pavarësisht të gjitha problemeve, të gjithë shpresojnë për një sezon të mirë turistik këtë verë./Alsat.mk.