Gjykata e Lartë në SHBA lejon përdorimin e pilulave për abort

Gjykata e Lartë e SHBA vendosi të premten që gratë të lejohen të kenë akses ne ilaçin që i jep fund shtatzënive deri në përfundimin e një procesi gjyqësor mbi këtë çështje.

Në këtë mënyrë, Gjykata vendosi pro kërkesave urgjente të administratës Biden dhe prodhuesit të ilaçit mifepriston, për të mos lejuar zbatimin e një vendimi të një gjykate më të ulët, që synonte ta ndalonte pilulën në të gjithë vendin.

E ardhmja e ilaçit, mifepriston,  u vu në pikëpyetje pasi një gjykatës i Teksasit u përpoq të zhvlerësonte miratimin e tij të gjatë.

Kjo ndodhi pasi Gjykata e Lartë, e cila ka një shumicë konservatore 6-3, përmbysi Roe v Wade në qershor të vitit të kaluar, duke i dhënë fund garancisë mbarëkombëtare për abortin dhe duke u dhënë shteteve fuqinë për të ndaluar procedurën.

Me vendimin e së premtes, çështja mifepristone tani kthehet në Gjykatën e Apelit të Rrethit të 5-të më të ulët.

Ka të ngjarë që çështja të dalë përsëri në Gjykatën e Lartë, duke vendosur vendimin më domethënës për çështjen e abortit që nga rrëzimi i Roe.

Mifepristoni është pjesë e një regjimi me dy barna që tani përbën më shumë se gjysmën e aborteve në vend. Është përdorur nga më shumë se pesë milionë gra në SHBA për t’i dhënë fund shtatzënisë.

Ai u miratua për herë të parë nga Administrata Amerikane e Ushqimit dhe Barnave (FDA) më shumë se 20 vjet më parë, pas katër vjet shqyrtimi.

FDA gjithashtu vendosi mifepristone në një kategori prej 60 barnash që rregullohen nën një sistem kufizimesh shtesë dhe vlerësimesh të rregullta.

Organizatat kryesore mjekësore, duke përfshirë Kolegjin Amerikan të Obstetrikës dhe Gjinekologëve dhe Organizatën Botërore të Shëndetësisë, kanë thënë se pilula e abortit është e sigurt dhe efektive.

Por në fillim të këtij muaji, gjykatësi i gjykatës së Teksasit, Matthew Kacsmaryk vendosi të pezullojë miratimin e FDA të mifepristone, duke thënë se agjencia kishte shkelur rregullat federale që lejonin miratimin e përshpejtuar të disa barnave dhe kishte gabuar në vlerësimin e saj shkencor të ilaçit.

Vendimi paraprak i gjyqtarit Kacsmaryk erdhi pasi një grup profesionistësh shëndetësorë kundër abortit nisën një çështje që sfidonte sigurinë e mifepristone.

Vendimi i tij i 7 prillit u mor vetëm pak minuta përpara se një vendim nga një gjykatës në shtetin e Uashingtonit të urdhëronte FDA-në të mos bënte asnjë ndryshim në disponueshmërinë e ilaçit dhe të ruante aksesin në mifepristone në 17 shtete të SHBA.

Administrata e Presidentit të SHBA Joe Biden apeloi vendimin e Teksasit dhe kërkoi që urdhri i gjykatës së Teksasit të vihej në pritje.

Një gjykatë e ndarë e apelit tha se mifepristoni mund të mbetej në dispozicion, por me kufizime të caktuara, ndërsa apelimi ishte në proces.

Ndër kufizimet e vendosura nga Gjykata e Apelit të Rrethit të 5-të ishte një kufizim në dërgimin e pilulave me postë, duke kërkuar në fakt vizita personale. Këto kufizime tani për tani janë anuluar nga Gjykata e Lartë.